وینزویلا کے صدرکی امریکی تحویل میں تصویر جاری۔ اب یہ ملک ہم چلائیں گے، ٹرمپ

صدر ٹرمپ نے اپنے سوشل میڈیا ٹروتھ سوشل پر ایک تصویر شیئر کرتے ہوئے کہا ہے کہ نکولس مادورو، یو ایس ایس آئیوو جیما پر۔ ٹرمپ نے کہا ہے کہ امریکہ وینیزویلا کو چلانے جا رہا ہے جب تک کہ وہاں محفوظ، مناسب اور منصفانہ انتقالِ اقتدار ممکن نہیں ہو جاتا۔
یو ایس ایس آییوو جیما وہی لڑاکا بحری جہاز ہے جس کے بارے میں ٹرمپ نے فاکس نیوز کو بتایا تھا کہ وینزویلا کے صدر کو امریکہ لے جا رہا ہے۔جاری کی گئی تصویر میں مادورو نظر آ رہے ہیں، جن کی آنکھوں پر ماسک ہے، کانوں میں ہیڈفون اور وہ سرمئی رنگ کا ٹریک سوٹ پہنے ہوئے ہیں۔

امریکی نشریاتی ادارے سی بی ایس کے مطابق، امریکی فوجی طیارہ جس میں مادورو موجود ہیں،جلد ا ورنج کانٹی، نیویارک میں ہڈسن ویلی کے علاقے میں واقع سٹیورٹ ایئرپورٹ پر لینڈ کرنے کی توقع ہے۔
ڈونلڈ ٹرمپ نے دعوی کیا ہے کہ امریکی افواج نے کاراکاس کے وسط میں ایک انتہائی محفوظ فوجی قلعے پر کارروائی کرتے ہوئے وینیزویلا کے صدر نکولس مادورو کو انصاف کے کٹہرے میں لا کھڑا کیا ہے۔انھوں نے کہا کہ اس حملے میں وینیزویلا کی تمام فوجی صلاحیتیں بے اثر کر دی گئیں اور کاراکاس میں آپریشن کے دوران امریکہ نے اپنی مہارت سے بجلی کی فراہمی بھی معطل کر دی۔ٹرمپ نے یہ بھی کہا ہے کہ وینزویلا کے صدر نکولاس مادورو کو گرفتار کر کے امریکہ منتقل کرنے کے بعد واشنگٹن نہ صرف ملک کے مستقبل میں بلکہ تیل سے مالا مال وینزویلا کی آئل انڈسٹری میں بھی بہت مضبوط انداز میں شامل ہوگا۔ امریکہ کے پاس دنیا کی سب سے بڑی اور بہترین آئل کمپنیاں ہیں، اور ہم اس شعبے میں بڑی شمولیت کے لیے جا رہے ہیں۔

فوکس نیوز کو ٹیلی فونک انٹرویو میں ٹرمپ نے کہا، ہم یہ خطرہ مول نہیں لے سکتے کہ کوئی اور آ کر سب کچھ سنبھال لے جو وہ (مادورو) چھوڑ گیا ہے یا جہاں اس نے کام چھوڑا تھا۔

ٹرمپ کے مطابق مادورو اور ان کی اہلیہ پر نیویارک کے جنوبی ضلع میں مہلک منشیات پر مبنی دہشت گردی کی مہم چلانے کے الزامات کے تحت فردِ جرم عائد کر دی گئی ہے اور اب دونوں امریکی انصاف کا سامنا کریں گے۔ذرائع کا کہنا ہے کہ صدر مادورو اس وقت امریکی فوج کی تحویل میں ہیں اور لینڈنگ کے بعد انھیں وفاقی حکام کے حوالے کر دیا جائے گا۔مادورو کو اگلے ہفتے نیویارک کی فیڈرل کورٹ، سدرن ڈسٹرکٹ میں پیش کیے جانے کی توقع ہے
امریکی اٹارنی جنرل پام بونڈی نے کہا ہے کہ وینزویلا کے صدر نکولاس مادورو اور ان کی اہلیہ کو منشیات سے متعلق الزامات کا سامنا ہے اور وہ جلد ہی امریکی سرزمین پر امریکی انصاف کے پورے غضب کا سامنا کریں گے۔پام بونڈی نے ایکس پر لکھا کہ مادورو پر منشیات پر مبنی دہشت گردی کی سازش، کوکین درآمد کرنے کی سازش، اور امریکہ کے خلاف مشین گنز اور تباہ کن ہتھیار رکھنے کی سازش کے الزامات عائد کیے گئے ہیں۔ ان کے مطابق یہ فردِ جرم نیویارک میں عائد کی گئی۔
امریکی وزیرخارجہ روبیو نے الزام عائد کیا کہ مادوروکارٹیل ڈی لوس سولیس کے سربراہ ہیں، جسے انہوں نے منشیات کا دھندہ کرنے والی ایک دہشت گرد تنظیم قرار دیا۔ انہوں نے مزید کہا کہ مادورو امریکہ میں منشیات اسمگل کرنے کے الزامات کے تحت پہلے ہی فردِ جرم کا سامنا کر رہے ہیں۔
مادورو کو ایک انتہائی سخت حفاظتی حصار میں قائم قلعہ نما مقام سے گرفتار کیا گیا اور اس کارروائی میں امریکی فوج کی کوئی ہلاکت نہیں ہوئی۔امریکہ کے صدرنے بتایا ہے کہ چند افراد زخمی ہوئے مگر وہ واپس آ گئے اور ان کی حالت بہتر ہے۔