شدید سردی اور دھند میں سکول کھل گئے

 پشاور: شہر اور مضافاتی علاقوں میں شدید سردی، گھنی دھند اور بوندا باندی کے باعث معمولاتِ زندگی متاثر ہو رہے ہیں، جبکہ پشاور یونیورسٹی کے زیر انتظام سکول کھول دیے گئے ہیں، جس پر والدین میں تشویش کی لہر دوڑ گئی ہے۔

یونیورسٹی روڈ اور ملحقہ علاقوں میں دھند اور بوندا باندی کے باعث حدِ نگاہ بعض مقامات پر صفر ہو گئی ہے۔ محکمہ موسمیات کے مطابق شہر میں کم سے کم درجہ حرارت 4 ڈگری سینٹی گریڈ ریکارڈ کیا گیا۔

والدین کا کہنا ہے کہ شدید سردی اور دھند میں پرائمری سکول کے بچوں کا سکول جانا ان کی صحت کے لیے خطرناک ہو سکتا ہے اور اس صورتحال میں بچوں کے بیمار ہونے کے امکانات بڑھ گئے ہیں۔

والدین نے حکومت اور متعلقہ حکام سے مطالبہ کیا ہے کہ وہ فوری نوٹس لیتے ہوئے سکولوں کے اوقات یا تعطیلات سے متعلق مناسب فیصلہ کریں تاکہ بچوں کی صحت محفوظ رہ سکے۔