عثمان خواجہ کا آسٹریلیا میں مسجد تعمیر کرنے کا اعلان

سڈنی(اُمت نیوز)آسٹریلیا کے اوپننگ بلے باز پاکستانی نژاد عثمان خواجہ نے اعلان کیا ہے کہ کرکٹ سے ریٹائرمنٹ کے بعد وہ اپنے والد کے نام پر آسٹریلیا میں ایک مسجد تعمیر کریں گے۔ عثمان خواجہ نے کہا کہ اب وہ وقت آ گیا ہے جب اپنے وعدے کو پورا کریں گے۔

عثمان خواجہ نے یاد دلایا کہ بچپن میں ان کے والد ایک کافی شاپ میں کام کرتے تھے اور عصر کے بعد انہیں پریکٹس کے لیے لے جاتے تھے۔ والد کا ان پر گہرا یقین تھا اور وہ کہتے تھے کہ “ہم پاکستانی ہیں، لیکن ایک دن تم آسٹریلیا کی جانب سے ضرور کھیلو گے۔” عثمان خواجہ نے بتایا کہ اللہ کی مدد اور والدین کی دعاؤں کی بدولت وہ آسٹریلوی ٹیم میں شامل ہونے میں کامیاب ہوئے، جو کہ ایک بہت مشکل کارنامہ تھا۔

انہوں نے کہا کہ ان کی والدہ رات کو نماز کے لیے اٹھتی تھیں اور پہلی دعا ان کی کامیابی کے لیے کرتی تھیں۔ عثمان خواجہ نے مزید کہا کہ مسجد کے لیے جگہ خرید لی گئی ہے اور کاغذی کارروائی مکمل ہونے کے بعد اس مہینے کے آخر میں تعمیراتی کام شروع کر دیا جائے گا۔

عثمان خواجہ اس وقت اپنے کیریئر کا آخری ٹیسٹ میچ سڈنی میں انگلینڈ کے خلاف کھیل رہے ہیں۔