وینزویلا کی اپوزیشن رہنما نےوطن واپسی کا اعلان کردیا

کاراکاس: وینزویلا کی معروف اپوزیشن رہنما اور نوبل امن انعام یافتہ ماریا کورینا ماچادو نے اعلان کیا ہے کہ وہ جلد از جلد اپنے وطن واپس جانے کا ارادہ رکھتی ہیں۔ یہ بیان انہوں نے امریکی فوجی کارروائی اور صدر نکولس مادورو کی گرفتاری کے بعد دیا۔

ماچادو نے فوکس نیوز کو انٹرویو دیتے ہوئے کہا کہ وہ اس وقت فیصلہ کر رہی ہیں کہ وہ کس وقت اور کہاں سب سے مؤثر طریقے سے وینزویلا کی جمہوری قوت کا حصہ بن سکتی ہیں۔ انہوں نے وطن واپسی کے عزم کا اظہار کرتے ہوئے کہا کہ وہ وینزویلا کے عوام کے لیے مؤثر کردار ادا کرنا چاہتی ہیں۔

صدر مادورو کی گرفتاری کے بعد سیاسی خلا پیدا ہوا ہے اور عارضی طور پر ڈیلسی روڈریگز نے اقتدار سنبھالا ہے، جسے ماچادو نے سخت تنقید کا نشانہ بنایا۔ ماچادو اکتوبر 2025 میں ناروے میں نوبل امن انعام وصول کرنے کے بعد وینزویلا واپس نہیں آئی تھیں۔ وہ ابتدا میں چھپ کر رہیں کیونکہ انہیں گرفتاری کا خدشہ تھا اور بعد میں طبی علاج کے لیے کسی خفیہ مقام پر گئی تھیں۔

ماچادو نے کہا کہ وہ جمہوری انتقال اور آزاد انتخابات کی خواہاں ہیں اور ان کا خیال ہے کہ ان کی جماعت آزاد و منصفانہ انتخابات میں اکثریت سے کامیاب ہوگی۔ انہوں نے وینزویلا کو ایک آزاد اور توانائی کے شعبے میں مضبوط ملک بنانے کا عزم بھی ظاہر کیا۔