فائیو جی اسپیکٹرم نیلامی،ٹیلی کام آپریٹرز کی وارننگ جاری

اسلام آباد: حکومت کی جانب سے فائیو جی اسپیکٹرم کی نیلامی کی تیاری کے دوران ٹیلی کام آپریٹرز نے خبردار کیا ہے کہ سستے اور قابلِ رسائی آلات کی دستیابی کے بغیر نئی نسل کے نیٹ ورکس کو جلد نافذ کرنا نقصان دہ ہو سکتا ہے-

ٹیلی کام آپریٹرز کا کہنا ہے کہ قبل از وقت فائیو جی کے نفاذ سے قیمتی زرمبادلہ ضائع ہونے کا خدشہ ہے اور سرمایہ بہتر کنیکٹیوٹی کی بہتری کے بجائے غیر مؤثر منصوبوں میں منتقل ہو سکتا ہے۔

پاکستان میں فور جی کی پہلی نیلامی کو ایک دہائی سے زیادہ عرصہ گزرنے کے باوجود کروڑوں موبائل صارفین اب بھی انٹرنیٹ کی سہولت سے محروم ہیں۔

ٹیلی کام صنعت کے رہنماؤں نے خبردار کیا ہے کہ یہ حقیقت ایک ’’عبرت ناک سبق‘‘ ہونی چاہیے، کیونکہ ملک اب فائیو جی اسپیکٹرم کی نیلامی کی تیاری کر رہا ہے۔

ٹیلی کام آپریٹرز ایسوسی ایشن آف پاکستان کے چیئرمین عامر ابراہیم نے پالیسی سازوں پر زور دیا ہے کہ وہ ماضی کی غلطیوں کو دہرانے سے گریز کریں اور صارفین کی ضروریات کو مدنظر رکھیں۔