ٹی20 ورلڈ کپ:پاکستان کے ممکنہ سکواڈ کے نام سامنے آ گئے

پاکستان کرکٹ بورڈ (پی سی بی) کے ذرائع کے مطابق ٹی20 ورلڈ کپ اور آسٹریلیا کے خلاف ہوم سیریز کے لیے قومی سکواڈ کے ممکنہ کھلاڑیوں کے نام سامنے آ گئے ہیں۔

ممکنہ سکواڈ میں کپتان سلمان علی آغا، صاحبزادہ فرحان، صائم ایوب، فخر زمان، شاداب خان، بابر اعظم، فہیم اشرف، محمد نواز، عثمان خان اور ابرار احمد شامل ہیں۔ اس کے علاوہ شاہین شاہ آفریدی، نسیم شاہ، حارث رؤف، سلمان مرزا اور خواجہ نافع کے بھی نام زیر غور ہیں، جبکہ عبدالصمد، وسیم جونیئر اور عثمان طارق ریزرو کھلاڑیوں کے طور پر شامل ہو سکتے ہیں۔

ہیڈ کوچ مائیک ہیسن سری لنکا کی سیریز کے اختتام پر لاہور پہنچیں گے اور وہ کپتان سلمان علی آغا کے ساتھ سلیکٹرز سے مشاورت کریں گے۔ مشاورت مکمل ہونے کے بعد چیئرمین پی سی بی محسن نقوی کی منظوری سے قومی سکواڈ کا حتمی اعلان کیا جائے گا۔

پی سی بی نے ٹی20 ورلڈ کپ کے لیے ابتدائی نام آئی سی سی کو بھی بھجوا دیے ہیں، اور 31 جنوری سے قبل آئی سی سی کی اجازت کے بغیر کسی بھی تبدیلی کا امکان موجود ہے۔