گروک پرنازیباتصاویرکی تحقیقات شروع،برطانیہ میں بھاری جرمانے کاخدشہ۔انڈونیشیااورملائشیا میں پابندی عائد

برطانوی واچ ڈاگ آف کام نے ایکس کے اے آئی ٹول گروک پر نازیباتصاویرکی تحقیقات کا آغاز کیا ہے۔انڈونیشا اور ملائشیا نے گروک پر پابندی لگادی۔

ایک بیان میں آف کام نے کہا ہےکہ گہری تشویشناک رپورٹس ہیں کہ چیٹ بوٹ کا استعمال ناشائستہ تصاویرکے لیے کیا جا رہا ہے۔اگر قانون کی خلاف ورزی پائی گئی تو، Ofcom ممکنہ طور پرایکس کو اپنی دنیا بھر کی آمدنی کا 10 فیصد یا 18 ملین پائونڈ، جو بھی زیادہ ہو، جرمانہ کر سکتا ہے۔

انڈونیشیا اور ملائیشیا نےایلون مسک کے سوشل میڈیاپلیٹ فارم ایکس پر اے آئی چیٹ باٹ گروک کو بلاک کر دیا ہے، نازیباتصاویر کا سکینڈل سامنے آنے کے بعد ایسا کرنے والے یہ پہلے ممالک ہیں۔

انڈونیشیا کے ڈیجیٹل وزیر میتیا حفید نے کہا ہے کہ یہ پابندی عورتوں، بچوں اور وسیع تر عوام کو مصنوعی ذہانت کی ٹیکنالوجی کے استعمال سے تیار کیے جانے والے جعلی فحش مواد کے خطرات سے بچانے کے لیے ہے۔
ملائیشیا نےفحش تصاویر بنانے کے لیے Grok کے غلط استعمال پر عارضی پابندی کا اعلان کیا، جس میں خواتین اور نابالغوں پر مشتمل مواد شامل ہے۔

انڈونیشیا اور ملائیشیا دونوں مسلم اکثریتی ممالک ہیں جن میں فحش مواد کے خلاف سخت قوانین ہیں۔

برطانیہ، یورپی یونین اوربھارتی حکام نے بھی گروک کے بارے میں خدشات کا اظہار کیا ہے۔ ایک یورپی ادارہ اے آئی فارنزکس جو الگورتھم کی تحقیقات کرتا ہے، نے 25 دسمبر اور 1 جنوری کے درمیان گروک کے ذریعے تیار کردہ20 ہزار تصاویر اور50 ہزارصارفین کی درخواستوں کا تجزیہ کیا۔اس دوران کپڑے اور بکنی کے حوالے سے کئی اصطلاحات کا بہت زیادہ پھیلاؤ دیکھاگیا۔