یوکرین بحران کا حل صرف مذاکرات میں ہے، پاکستان کا مؤقف

اقوام متحدہ کی سلامتی کونسل سے خطاب کرتے ہوئے پاکستان کے مستقل مندوب عاصم افتخار کا کہنا تھا کہ یوکرین کے مسئلے پر دیرپا امن کے قیام کے لیے مکالمے کو فوقیت دینا ہی واحد قابلِ عمل راستہ ہے۔ انہوں نے زور دیا کہ تنازعات کا حل بات چیت کے ذریعے تلاش کرنا عالمی امن کے لیے ناگزیر ہے۔

پاکستان نے واضح کیا ہے کہ یوکرین کے بحران کا پائیدار اور مؤثر حل طاقت یا تصادم نہیں بلکہ صرف اور صرف مذاکرات کے ذریعے ہی ممکن ہے۔

پاکستانی مندوب نے امریکا سمیت مختلف ممالک کی سفارتی کوششوں کو سراہتے ہوئے امید ظاہر کی کہ فریقین جاری سفارتی عمل سے بھرپور فائدہ اٹھائیں گے۔ ان کے مطابق یہ کوششیں ایک ایسے منصفانہ اور پائیدار تصفیے کی بنیاد بن سکتی ہیں جو تمام متعلقہ فریقوں کے لیے قابلِ قبول ہو۔

عاصم افتخار نے مزید کہا کہ پاکستان کو توقع ہے کہ یہ سفارتی اقدامات یوکرین اور روس دونوں کے سلامتی مفادات سے ہم آہنگ ہوں گے اور یورپ میں امن و استحکام کے فروغ کا باعث بنیں گے۔