دورہ جنوبی افریقہ کے لیے پاکستان ویمنز کرکٹ ٹیم کا اعلان

لاہور:پاکستان کرکٹ بورڈ نے دورہ جنوبی افریقہ کے لیے پاکستان ویمنز کرکٹ ٹیم کا اعلان کر دیا ہے۔ پاکستانی ویمنز ٹیم 10 فروری سے جنوبی افریقہ کا دورہ کرے گی، جہاں وہ ٹی ٹوئنٹی اور ون ڈے سیریز میں شرکت کرے گی۔

اعلان کے مطابق فاطمہ ثنا دونوں فارمیٹس میں قومی ٹیم کی قیادت برقرار رکھیں گی۔ سائرہ جبین اور ہمنہ بلال کو پہلی بار قومی اسکواڈ میں شامل کیا گیا ہے، جبکہ عائشہ ظفر، گل فیروزہ، تسمیہ رباب اور نجیہہ علوی کی ون ڈے اسکواڈ میں واپسی ہوئی ہے۔

پی سی بی کے مطابق عائشہ ظفر، گل فیروزہ، منیبہ علی، نصرہ سندھو اور عالیہ ریاض دونوں فارمیٹس میں ٹیم کا حصہ ہوں گی۔ ون ڈے اسکواڈ میں ڈیانہ بیگ، نجیہہ علوی، صدف شمس اور سیدہ عروب کو شامل کیا گیا ہے، جبکہ ٹی ٹوئنٹی اسکواڈ میں ہمنہ بلال، سائرہ جبین، طوبیٰ حسن اور ایمان فاطمہ کو شامل کیا گیا ہے۔

قومی ٹیم آئی سی سی ویمنز ٹی ٹوئنٹی ورلڈ کپ کی تیاریوں کے سلسلے میں یہ دورہ کر رہی ہے۔ پری سیریز ٹریننگ کیمپ یکم سے 6 فروری تک کراچی میں منعقد ہوگا، جو حنیف محمد ہائی پرفارمنس سینٹر میں لگایا جائے گا۔

جنوبی افریقہ کے خلاف ٹی ٹوئنٹی سیریز کے تمام میچز ڈے اینڈ نائٹ ہوں گے۔ ٹی ٹوئنٹی میچز پوچف اسٹروم، بینونی اور کمبرلے میں کھیلے جائیں گے، جبکہ ون ڈے سیریز سے قبل کمبرلے میں 50 اوورز کا وارم اپ میچ بھی ہوگا۔

ون ڈے میچز بلوم فونٹین، سینچورین اور ڈربن میں کھیلے جائیں گے، جبکہ دوسرے ون ڈے کو ڈے نائٹ رکھا گیا ہے۔ پاکستانی ویمنز ٹیم پانچ سال بعد دو طرفہ سیریز کے لیے جنوبی افریقہ کا دورہ کر رہی ہے۔

کوچنگ اسٹاف میں مینٹور وہاب ریاض، عمران فرحت، عبدالرحمان اور عبدالمجید شامل ہیں، جبکہ ٹیم مینیجر عائشہ اشعر اور میڈیا منیجر رضا راشد ہوں گے۔

یہ دورہ آئی سی سی ویمنز ٹی ٹوئنٹی ورلڈ کپ 2026 کی تیاریوں کا ایک اہم مرحلہ قرار دیا جا رہا ہے۔