بھارتی عدالت کی جانب سے حریت رہنما آسیہ اندرابی کو مجرم قرار دے دیا گیا

نئی دہلی: بھارتی عدالت نے حریت رہنما اور دخترانِ ملت کی سربراہ آسیہ اندرابی کو ایک سیاسی نوعیت کے مقدمے میں مجرم قرار دے دیا ہے۔ ان کے ساتھ حریت رہنما فہمیدہ صوفی اور ناہیدہ نسرین کو بھی مجرم ٹھہرایا گیا ہے۔

کشمیر میڈیا سروس کے مطابق یہ مقدمات بھارتی نیشنل انویسٹی گیشن ایجنسی (این آئی اے) کی عدالت میں چلائے گئے، جنہیں کشمیری حلقے سیاسی بنیادوں پر قائم مقدمات قرار دے رہے ہیں۔ عدالت کی جانب سے تینوں رہنماؤں کو سزائیں 17 جنوری کو سنائے جانے کا امکان ہے۔

رپورٹ کے مطابق آسیہ اندرابی کو اپریل 2018 میں گرفتار کیا گیا تھا، جبکہ ان کے شوہر عاشق حسین گزشتہ تین دہائیوں سے مختلف مقدمات کے تحت بھارتی حراست میں ہیں۔

کشمیری تنظیموں اور انسانی حقوق کے حلقوں کی جانب سے ان مقدمات پر شدید تحفظات کا اظہار کیا جا رہا ہے اور انہیں کشمیری قیادت کو دبانے کی کوشش قرار دیا جا رہا ہے۔