متحدہ عرب امارات میں آج جنگی جہازوں کا فضائی مارچ ہوگا

متحدہ عرب امارات میں آج جنگی طیاروں اور ہیلی کاپٹروں پر مشتمل ایک خصوصی فضائی مارچ منعقد کیا جائے گا، جو یو اے ای پر حوثیوں کے حملے کی یاد میں ترتیب دیا گیا ہے۔ فضائی مارچ کے دوران جنگی جہاز پورے ملک کی فضاؤں میں پرواز کریں گے۔دبئی کے ولی عہد، نائب وزیرِاعظم اور وزیرِ دفاع شیخ حمدان بن محمد بن راشد آل مکتوم نے عوام سے اپیل کی ہے کہ وہ ہفتے کے روز صبح 11 بجے اماراتی قومی ترانے کے دوران یکجہتی اور اتحاد کا اظہار کریں۔یہ فضائی مارچ چار سال قبل ہونے والے اس حملے کی یاد میں منعقد کیا جا رہا ہے، جس میں حوثیوں نے عرب امارات کو میزائل حملے کا نشانہ بنایا تھا۔ اس حملے کے نتیجے میں تین افراد جاں بحق ہوئے تھے، جن میں پاکستانی محنت کش معمور خان بھی شامل تھے۔فضائی مارچ کا آغاز ابوظبی سے ہوگا اور یہ متحدہ عرب امارات کی تمام ریاستوں سے گزرتا ہوا مکمل کیا جائے گا۔ اس دوران جنگی طیاروں کی گھن گرج فضاؤں میں گونجتی رہے گی۔