سابق کپتان شاہد آفریدی کا کراچی چھوڑنے کا اعلان

پاکستان کرکٹ ٹیم کے سابق کپتان شاہد آفریدی نے کراچی چھوڑ کر مستقل طور پر اسلام آباد منتقل ہونے کی تصدیق کر دی ہے۔ انہوں نے بتایا کہ چند ذاتی وجوہات کے باعث یہ فیصلہ کیا گیا ہے۔

اسلام آباد میں اپنی نئی رہائش گاہ پر گفتگو کرتے ہوئے شاہد آفریدی نے کہا کہ کسی بھی ملک کی ترقی کے لیے پالیسیوں، جمہوری عمل اور ریاستی اداروں میں تسلسل نہایت ضروری ہے۔ ان کا کہنا تھا کہ جب ادارے اپنی آئینی مدت مکمل کرتے ہیں تو پالیسیوں میں استحکام آتا ہے اور ترقی کے ثمرات جلد عوام تک پہنچتے ہیں۔

شاہد آفریدی نے کہا کہ وہ پاکستان کو تیزی سے ترقی کرتا ہوا ملک دیکھنا چاہتے ہیں، تاہم اس کے لیے سب سے بنیادی عنصر تسلسل ہے۔ انہوں نے کہا کہ پاکستان اور پاکستان کرکٹ نے انہیں دنیا بھر میں عزت، مقام اور شناخت دی۔

سابق کپتان کا کہنا تھا کہ وہ اب پاکستان کرکٹ اور ملک کو کچھ واپس لوٹانا چاہتے ہیں، تاہم فی الحال سیاست میں آنے کا کوئی ارادہ نہیں۔ انہوں نے اس بات پر زور دیا کہ حکومت کو اپنی پانچ سالہ آئینی مدت مکمل کرنی چاہیے اور چیف جسٹس، آرمی چیف سمیت تمام اہم آئینی عہدوں پر فائز شخصیات کو اپنی مقررہ مدت پوری کرنے دی جانی چاہیے۔

شاہد آفریدی نے مزید بتایا کہ ماضی میں انہیں اہم حکومتی عہدوں کی پیشکش کی گئی، تاہم انہوں نے ہمیشہ ایسی ذمہ داریوں سے گریز کیا کیونکہ رسمی عہدے ان کے لیے کوئی کشش نہیں رکھتے۔