پاکستان سپر لیگ کے انتظامی ڈھانچے میں نمایاں تبدیلیوں کا اعلان

کراچی: پاکستان سپر لیگ کے انتظامی ڈھانچے میں نمایاں تبدیلیوں کا اعلان کر دیا گیا ہے جن پر عملدرآمد ایچ بی ایل پی ایس ایل کے 11ویں ایڈیشن سے کیا جائے گا۔

پی ایس ایل کی تاریخ میں پہلی مرتبہ کھلاڑیوں کا انتخاب ڈرافٹ کے بجائے آکشن کے ذریعے ہوگا، جس کا مقصد ٹیموں میں بہتر توازن پیدا کرنا اور کھلاڑیوں کے لیے مالی مواقع میں اضافہ کرنا ہے۔

لیگ انتظامیہ کے مطابق مینٹورز، برانڈ ایمبیسڈر اور رائٹ ٹو میچ جیسے قوانین کو ختم کر دیا گیا ہے۔ آکشن سے قبل ہر فرنچائز کو مجموعی طور پر چار کھلاڑی برقرار رکھنے کی اجازت ہوگی، تاہم ہر کیٹیگری میں صرف ایک کھلاڑی ریٹین کیا جا سکے گا۔

نئی شامل ہونے والی دونوں ٹیموں کو آکشن سے پہلے چار کھلاڑی منتخب کرنے کا خصوصی اختیار دیا جائے گا، جبکہ ہر فرنچائز کو ایک غیر ملکی کھلاڑی ڈائریکٹ سائن کرنے کی اجازت بھی دی گئی ہے۔ ڈائریکٹ سائننگ کے لیے شرط رکھی گئی ہے کہ متعلقہ کھلاڑی پی ایس ایل 2025 کے ایڈیشن میں شامل نہ رہا ہو۔

انتظامیہ کے مطابق آکشن کے لیے ہر ٹیم کا سیلری کیپ 16 لاکھ امریکی ڈالر مقرر کی گئی ہے۔ ایچ بی ایل پاکستان سپر لیگ کا 11واں ایڈیشن 26 مارچ سے شروع ہوگا، جبکہ شائقین کرکٹ کے لیے خوشخبری یہ ہے کہ پی ایس ایل 11 کے چند میچز اقبال اسٹیڈیم فیصل آباد میں بھی کھیلے جائیں گے۔