کثیر ملکی فضائی مشق،پاک فضائیہ کا دستہ سعودی عرب پہنچ گیا

اسلام آباد: پاک فضائیہ کا دستہ کثیر ملکی فضائی جنگی مشق "سپیئرز آف وکٹری-2026” میں شرکت کے لیے سعودی عرب کے کنگ عبدالعزیز ایئر بیس پہنچ گیا۔

اس دستے میں جدید ایف-16 بلاک 52 جنگی طیارے اور فضائی و زمینی عملہ شامل ہے، جو طویل فاصلے کی نان سٹاپ پرواز کے ذریعے مشق میں حصہ لینے کے لیے پہنچا۔

آئی ایس پی آر کے مطابق یہ بین الاقوامی مشق پاکستان سمیت دس ممالک کی فضائی افواج کی مشترکہ تربیت ہے، جس میں جدید الیکٹرانک وارفیئر آپریشنز پر خصوصی توجہ دی جائے گی۔

پاک فضائیہ کی اس مشق میں شرکت علاقائی اور عالمی عسکری تعاون کا عملی مظاہرہ ہے اور جدید جنگی ماحول میں اس کی پیشہ ورانہ مہارت کی عکاسی کرتی ہے۔

پاک فضائیہ نے اپنی ایف-16 بلاک 52 طیاروں کی صلاحیتوں کا بین الاقوامی سطح پر موثر مظاہرہ کیا ہے، جو عالمی فضائی افواج کے ساتھ مشترکہ جنگی تربیت میں اہم کردار ادا کرے گی۔

یہ کثیر ملکی مشق علاقائی سلامتی اور دفاعی تعاون کو فروغ دینے کا اہم پلیٹ فارم ہے، جہاں پاک فضائیہ کی شرکت بین الاقوامی تعاون اور پیشہ ورانہ مہارت کا ثبوت ہے۔