سعودی وزارتِ خارجہ کا کراچی گل پلازہ آتشزدگی پر گہرے دکھ کا اظہار

سعودی وزارتِ خارجہ نے کراچی کے گل پلازہ میں پیش آنے والے آتشزدگی کے افسوسناک واقعے پر گہرے رنج و غم کا اظہار کیا ہے۔ واقعے میں قیمتی انسانی جانوں کے ضیاع پر سعودی حکومت نے پاکستان کے عوام سے دلی تعزیت کی ہے۔

وزارتِ خارجہ کی جانب سے جاری بیان میں گل پلازہ حادثے میں جاں بحق ہونے والے 27 افراد پر افسوس کا اظہار کرتے ہوئے کہا گیا ہے کہ سعودی عرب اس مشکل وقت میں متاثرہ خاندانوں کے ساتھ کھڑا ہے۔ بیان میں زخمیوں کی جلد صحت یابی کے لیے نیک تمناؤں اور دعاؤں کا بھی اظہار کیا گیا۔

سعودی وزارتِ خارجہ نے پاکستان اور اس کے عوام کے لیے سلامتی، تحفظ اور خیرسگالی کی خواہشات کا اعادہ کیا ہے۔

دوسری جانب سعودی فرمانروا شاہ سلمان بن عبدالعزیز کی زیر صدارت سعودی کابینہ کا اجلاس منعقد ہوا جس میں علاقائی اور عالمی امور کا تفصیلی جائزہ لیا گیا۔ اجلاس میں غزہ سے متعلق جامع امن منصوبے کے دوسرے مرحلے اور غزہ پٹی کی انتظامیہ کے لیے فلسطینی قومی کمیٹی کے کام کے آغاز کا خیرمقدم کیا گیا۔

کابینہ اجلاس میں پاکستان اور سعودی عرب کے درمیان بجلی کے شعبے میں تعاون سے متعلق مفاہمتی یادداشت کی منظوری بھی دی گئی، جس کا مقصد توانائی کے شعبے میں تعاون کو فروغ دینا اور دونوں ممالک کے درمیان شراکت داری کو مزید مضبوط بنانا ہے۔