کرس ٹیلر پاکستان کے ڈومیسٹک کرکٹ میچز میں فرائض انجام دیں گے

ویسٹ انڈیز سے تعلق رکھنے والے معروف کرکٹ امپائر کرس ٹیلر پاکستان کے ڈومیسٹک کرکٹ سیزن میں امپائرنگ کے فرائض سرانجام دیں گے۔ وہ بدھ سے نیشنل اسٹیڈیم کراچی میں شروع ہونے والے پریذیڈنٹ ٹرافی گریڈ ون کے چار روزہ میچ میں بطور آن فیلڈ امپائر ذمہ داریاں سنبھالیں گے۔

45 سالہ کرس ٹیلر بین الاقوامی اور ڈومیسٹک کرکٹ میں امپائرنگ کا وسیع تجربہ رکھتے ہیں اور آئی سی سی امپائرز ایکسچینج پروگرام کے تحت پاکستان پہنچے ہیں۔ وہ پریذیڈنٹ ٹرافی کے مجموعی طور پر تین فرسٹ کلاس میچز میں امپائرنگ کریں گے۔

کرس ٹیلر کا تعلق جمیکا سے ہے اور وہ اب تک پانچ ویمنز ون ڈے انٹرنیشنل اور تین ویمنز ٹی ٹوئنٹی انٹرنیشنل میچز میں بھی امپائرنگ کے فرائض انجام دے چکے ہیں۔ اس کے علاوہ وہ 41 فرسٹ کلاس، 56 لسٹ اے اور 53 ٹی ٹوئنٹی میچز میں امپائرنگ کا تجربہ رکھتے ہیں۔

وہ اپنے فرائض کا آغاز ایس این جی پی ایل اور غنی گلاس کے درمیان میچ سے کریں گے۔ اس کے بعد 27 جنوری سے کے سی سی اے اسٹیڈیم میں کے آر ایل اور ایس این جی پی ایل کے درمیان میچ کی نگرانی کریں گے۔ کرس ٹیلر اپنی آخری ذمہ داری 2 فروری سے نیشنل اسٹیڈیم میں پی ٹی وی اور ساحر ایسوسی ایٹس کے درمیان کھیلے جانے والے میچ میں ادا کریں گے۔