عیسائی پادری پر بد ترین تشدد، چہرے پر سرخ سندور مل دیا، جوتوں کا ہار پہنا کر گاؤں میں گھمایا

نئی دہلی: بھارت میں ہندو انتہا پسندوں کا عیسائی پادری پر بد ترین  تشدد، چہرے پر سرخ سندور مل دیا، جوتوں کا ہار پہنا کر گاؤں میں گھمایا۔

تفصیلات کے مطابق  بھارتی ریاست اوڈیشہ میں ہندو تنظیم بجرنگ دَل کے ایک جتھے نے عیسائی پادری کو تشدد کا نشانہ بنایا، جسے دی نیو انڈین ایکسپریس نے خوفناک واقعے کے طور پر رپورٹ کیا ہے۔

پادری اہلِ خانہ اور دیگر افراد کے ساتھ ایک گھر میں دعائیہ اجتماع میں شریک تھے، جب ہجوم نے انہیں نشانہ بنایا۔

بھارتی اخبار’’دی نیو انڈین ایکسپریس‘‘ کے مطابق پادری کو زبردستی گائے کی غلاظت کھلائی گئی اور مذہبی نعرے لگوائے گئے۔ہجوم نے پادری کو لاٹھیوں سے بری طرح مارا پیٹا، چہرے پر سرخ سندور مل دیا، جوتوں کا ہار پہنایا اور گاؤں میں گھمایا۔ درخواست کے باوجود پولیس نے انہیں مدد فراہم نہیں کی۔

ماہرین کے مطابق اقلیتوں پر اس قسم کے تشدد سے بھارت میں سماجی انتشار بڑھ رہا ہے اور ملک میں بغاوت کے خطرات مزید شدت اختیار کر رہے ہیں۔