امریکا نے ٹرمپ کے نیٹو بیان پر برطانوی تنقید مسترد کر دی

امریکا نے صدر ٹرمپ کے نیٹو سے متعلق بیان پر برطانیہ کی تنقید کو مسترد کر دیا ہے۔ وائٹ ہاؤس کا کہنا ہے کہ صدر ٹرمپ درست کہتے ہیں اور نیٹو کے لیے امریکا نے سب سے زیادہ قربانیاں دی ہیں۔

امریکا کا موقف ہے کہ نیٹو کے لیے دیگر تمام ممالک کے مقابلے میں امریکا نے سب سے زیادہ کردار ادا کیا ہے۔

دوسری جانب برطانوی وزیراعظم سرکئیر اسٹارمر نے افغانستان میں نیٹو کی کارروائیوں پر صدر ٹرمپ کے بیان کو خطرناک اور توہین آمیز قرار دیتے ہوئے معافی کا مطالبہ کیا تھا۔ انہوں نے کہا کہ اگر میں نے ایسا بیان دیا ہوتا تو یقیناً معافی مانگتا، اور 9/11 کے بعد افغانستان میں امریکا کے ساتھ جنگ کے دوران برطانیہ کے 457 فوجی ہلاک ہوئے تھے۔

صدر ٹرمپ نے دعویٰ کیا تھا کہ افغانستان میں نیٹو فوجی فرنٹ لائن سے دور رہے۔ اس پر امریکا میں مقیم برطانیہ کے شہزادہ ہیری نے کہا کہ افغانستان میں نیٹو افواج کی قربانیوں کا احترام کیا جانا چاہیے۔ انہوں نے مزید کہا کہ انہوں نے بھی افغانستان میں فوجی خدمات انجام دی ہیں، دوست بنائے اور کھوئے، اور بہت سے خاندانوں نے اپنے بیٹوں اور بیٹیوں کو دفن کیا، جبکہ بچے والدین کے بغیر رہ گئے۔