بھارت:مغربی بنگال میں نِپاہ وائرس،100 افراد قرنطینہ،ہائی الرٹ جاری

کولکتہ: بھارتی ریاست مغربی بنگال میں نپاہ وائرس کے پھیلاؤ کے بعد ہائی الرٹ جاری کر دیا گیا ہے۔

مقامی انتظامیہ کے مطابق 100 کے قریب افراد کو گھروں میں قرنطینہ کیا گیا ہے جبکہ ایک مریض کی حالت تشویشناک بتائی جا رہی ہے۔ حفاظتی اقدامات کے تحت سرکاری اہلکار وائرس کے پھیلاؤ کو روکنے کے لیے مکمل طور پر چوکس ہیں۔

رپورٹس کے مطابق تھائی لینڈ نے بھی احتیاطی تدابیر بڑھا دی ہیں اور مغربی بنگال سے آنے والے مسافروں کے لیے بڑے ہوائی اڈوں پر متعدی امراض کی اسکریننگ شروع کر دی گئی ہے۔

نپاہ وائرس پہلی بار 1998 میں ملائیشیا میں سامنے آیا تھا اور عالمی ادارہ صحت کے مطابق یہ ایک خطرناک zoonotic وائرس ہے جو بنیادی طور پر چمگادڑوں کے ذریعے پھیلتا ہے۔ ماہرین کے مطابق اس کے لیے ابھی تک کوئی مخصوص علاج یا منظور شدہ ویکسین دستیاب نہیں ہے، جس کے باعث عوام کو احتیاطی تدابیر اختیار کرنے کی ہدایت کی گئی ہے۔