نیپا وائرس کے خدشات،پاکستان میں ہائی الرٹ، سرحدوں پر سخت اسکریننگ شروع

 

اسلام آباد: بھارت میں نیپا وائرس کے پھیلاؤ کے بعد پاکستان میں بھی ہائی الرٹ جاری کر دیا گیا ہے، تاہم حکام کے مطابق ملک میں تاحال نیپا وائرس کا کوئی تصدیق شدہ کیس سامنے نہیں آیا۔

وفاقی وزارت صحت کے ذیلی ادارے بارڈر ہیلتھ سروسز نے اس حوالے سے باقاعدہ انتباہ اور ایڈوائزری جاری کرتے ہوئے ملک بھر کے ہوائی اڈوں، بندرگاہوں اور زمینی سرحدوں پر اسکریننگ کے عمل کو مزید سخت کرنے کی ہدایت کی ہے۔

وزارت صحت کے مطابق پاکستان آنے والے اور ٹرانزٹ مسافروں کی 100 فیصد اسکریننگ لازمی قرار دی گئی ہے، جس میں تمام مسافروں کی تھرمل اسکریننگ اور طبی معائنہ شامل ہوگا۔ اس کے ساتھ ساتھ مسافروں کی گزشتہ 21 دن کی مکمل سفری تاریخ کی تصدیق کرنے کی بھی ہدایت جاری کی گئی ہے۔

ایڈوائزری میں کہا گیا ہے کہ نیپا وائرس سے متاثرہ یا ہائی رسک علاقوں سے آنے والے افراد کی خصوصی نگرانی کی جائے گی، جبکہ مشتبہ علامات ظاہر ہونے کی صورت میں مسافر کو فوری طور پر آئسولیٹ کرنے کے احکامات دیے گئے ہیں۔ کلیئرنس کے بغیر کسی مسافر کو پاکستان میں داخلے کی اجازت نہیں دی جائے گی۔

ادھر بھارتی میڈیا کے مطابق بھارت کی ریاست مغربی بنگال میں نیپا وائرس کے 5 کیسز رپورٹ ہو چکے ہیں۔ وائرس کے ممکنہ پھیلاؤ کے پیش نظر تھائی لینڈ، ملائیشیا، ہانگ کانگ، سنگاپور اور نیپال میں بھی اسکریننگ کا عمل شروع کر دیا گیا ہے۔