پاکستانی اخبار فروش علی اکبر کو فرانس کا اعلیٰ سول اعزاز مل گیا

 

پیرس: فرانس کے صدر ایمانویل میکرون نے پاکستان سے تعلق رکھنے والے 74 سالہ علی اکبر کو فرانس کے اعلیٰ سول اعزازات میں سے ایک گرانڈ آرڈر آف میرٹ کا نائٹ بنانے کا اعزاز دیا۔

علی اکبر گزشتہ 50 سال سے پیرس کے تاریخی لاطینی کوارٹر میں کیفے ٹیرسز پر اخبارات فروخت کر رہے ہیں اور مقامی لوگوں میں بے حد مقبول ہیں۔ اعزاز دینے کی تقریب فرانسیسی صدارتی محل میں منعقد ہوئی، جہاں علی اکبر کی طویل خدمات کو سراہا گیا۔ یہ اعزاز فرانس میں شہری یا فوجی سطح پر نمایاں خدمات انجام دینے والوں کو دیا جاتا ہے۔

علی اکبر راولپنڈی سے تعلق رکھتے ہیں اور 1973 میں پاکستان سے فرانس آئے تھے۔ یہاں پہنچنے کے بعد انہوں نے اخبار فروشی کا پیشہ اختیار کیا اور ابتدا میں سوربون یونیورسٹی اور آس پاس کے تعلیمی اداروں میں طلبہ کو اخبارات فروخت کیے۔

گزشتہ نصف صدی میں انہوں نے پیرس میں اخبار فروشی کی روایت کو زندہ رکھا، جس کی وجہ سے نہ صرف مقامی افراد بلکہ بین الاقوامی میڈیا کی بھی توجہ حاصل ہوئی۔ فرانس کی جانب سے دیا گیا یہ اعزاز پاکستانی کمیونٹی کے لیے بھی باعث فخر قرار دیا جا رہا ہے۔