بسنت سے پہلے پتنگ کی ڈور پھیرنے سے 10 سالہ بچہ زخمی

 

لاہور کے علاقے ویلنشیاء ٹاؤن میں پتنگ کی ڈور پھیرنے کے باعث 10 سالہ بچہ مصطفیٰ آفندی شدید زخمی ہو گیا۔ زخمی بچے کو فوری طور پر قریبی ہسپتال منتقل کیا گیا جہاں طبی امداد کے بعد اس کی حالت خطرے سے باہر بتائی گئی اور اسے ڈسچارج کر دیا گیا۔

ڈی آئی جی آپریشنز فیصل کامران نے واقعے کا نوٹس لیتے ہوئے سیف سٹی کیمروں کی مدد سے ذمہ دار پتنگ بازوں کی نشاندہی کرنے کا حکم دیا۔ انہوں نے کہا کہ واقعے میں ملوث افراد کو قانون کے کٹہرے میں لایا جائے گا۔

فیصل کامران نے شہر بھر میں غیر قانونی پتنگ بازی کے خلاف کریک ڈاؤن مزید تیز کرنے کی ہدایت کی اور واضح کیا کہ مقررہ تاریخوں کے علاوہ پتنگ بازی مکمل طور پر ممنوع ہے۔ انہوں نے کہا کہ پتنگ بازی ایکٹ کی خلاف ورزی جان لیوا جرم ہے اور اس پر زیرو ٹالرنس پالیسی اپنائی گئی ہے۔