عمران خان کے طبی معائنے کے لیے نئی درخواست دائر

 

پاکستان تحریک انصاف (پی ٹی آئی) نے بانی پارٹی کے طبی معائنے کے لیے نئی درخواست دائر کر دی ہے۔

پی ٹی آئی کے چیئرمین بیرسٹر گوہر نے صحافیوں سے گفتگو کرتے ہوئے کہا کہ عمران خان کی صحت سے متعلق آگاہ نہ کرنا تشویشناک ہے، حکومت نے معلومات دینے میں دیر کی اور مکمل تفصیلات فراہم نہیں کیں۔

انہوں نے مطالبہ کیا کہ بانی پی ٹی آئی کے ذاتی معالجین کو رسائی دی جائے تاکہ صحت کے بارے میں تشویش ختم کی جا سکے۔

بیرسٹر گوہر نے مزید کہا کہ وفاقی وزراء خود پر یقین نہیں رکھتے، تو وہ بانی پی ٹی آئی کی صحت کے بارے میں کیا یقین دہانی کروا سکتے ہیں۔

 

دوسری طرف، پی ٹی آئی کے سینئر رہنما اسد قیصر نے صوابی میں پریس کانفرنس میں کہا کہ حکومتی وزراء مسلسل بانی پی ٹی آئی کی صحت کے بارے میں جھوٹ بولتے رہے اور ایک صوبے کے وزیراعلیٰ سے ملاقات تک نہیں کروائی گئی، حالانکہ ایک ملاقات سے معاملہ حل ہو سکتا تھا۔