بلوچستان میں شہید پولیس اہلکاروں کی نماز جنازہ ادا

بلوچستان میں دہشت گردوں کو ناکام بناتے ہوئے شہید ہونے والے پولیس اہلکاروں کی نمازِ جنازہ ادا کر دی گئی۔ جنازہ میں وفاقی وزیر داخلہ محسن نقوی، وزیر اعلیٰ بلوچستان میر سرفراز بگٹی، کور کمانڈر بلوچستان، صوبائی وزراء، اراکین اسمبلی، آئی جی پولیس بلوچستان، پولیس کے اعلیٰ حکام اور دیگر اہلکار بڑی تعداد میں شریک ہوئے۔

بلوچستان پولیس کے دستے نے اپنے شہید ساتھیوں کو گارڈ آف آنر پیش کیا جبکہ مسلح افواج کے افسران نے بھی شہداء کو سلیوٹ کیا۔

یہ  بھی پڑھیں:۔ بلوچستان میں 2 روزکے دوران فتنۃ الہندوستان کے108 دہشت گرد ہلاک،10 جوان اور 5 شہری شہید

وفاقی وزیر داخلہ محسن نقوی نے اس موقع پر کہا کہ ملک کی سلامتی کے لیے اپنی قیمتی جانیں قربان کرنے والے بہادر سپوتوں کو قوم سلام پیش کرتی ہے۔ انہوں نے مزید کہا کہ قانون نافذ کرنے والے اداروں نے دہشت گرد حملوں کو کامیابی کے ساتھ ناکام بنایا۔

بلوچستان کے وزیر اعلیٰ سرفراز بگٹی نے کہا کہ دہشت گردوں کی بزدلانہ کارروائیاں ہمارے عزم کو کمزور نہیں کر سکتیں بلکہ قوم کو مزید مضبوط بناتی ہیں۔ انہوں نے کہا کہ دہشت گرد عناصر ریاست کی طاقت اور عوام کے عزم کے سامنے کبھی کامیاب نہیں ہو سکتے۔