میواڑ یونیورسٹی میں نرسنگ کونسل کے خلاف احتجاج پر 33 کشمیری طلبہ معطل

بھارتی ریاست راجستھان میں واقع میواڑ یونیورسٹی نے نرسنگ کونسل کے خلاف احتجاج کرنے پر 33 کشمیری طلبہ کو معطل کر دیا ہے۔

بھارتی اخبار دی انڈین ایکسپریس کی رپورٹ کے مطابق یہ کارروائی ڈگری نرسنگ کونسل سے متعلق معاملات پر احتجاج کے بعد عمل میں لائی گئی۔ طلبہ کا مؤقف تھا کہ متعلقہ نرسنگ کونسلز کی منظوری نہ ہونے سے ان کی ڈگری اور پیشہ ورانہ مستقبل متاثر ہو سکتا ہے۔

جموں و کشمیر اسٹوڈنٹس ایسوسی ایشن نے اس فیصلے پر تشویش کا اظہار کرتے ہوئے کہا ہے کہ پچاس سے زائد کشمیری طلبہ کا تعلیمی مستقبل غیر یقینی صورتحال سے دوچار ہے۔ تنظیم کے مطابق طلبہ اپنے جائز مطالبات کے حق میں آواز اٹھا رہے تھے، تاہم یونیورسٹی انتظامیہ نے 33 طلبہ کو معطل کر دیا۔

یونیورسٹی انتظامیہ کی جانب سے اس اقدام کو ضابطہ اخلاق کی خلاف ورزی قرار دیا گیا ہے، جبکہ طلبہ تنظیموں کا کہنا ہے کہ مسئلے کا حل بات چیت اور انتظامی وضاحت کے ذریعے نکالا جانا چاہیے تاکہ متاثرہ طلبہ کی تعلیم متاثر نہ ہو۔

یاد رہے کہ مختلف تعلیمی اداروں میں پیشہ ورانہ کونسلز کی منظوری اور رجسٹریشن سے متعلق معاملات طلبہ کے لیے اہم حیثیت رکھتے ہیں کیونکہ اس کا براہِ راست تعلق ان کے تعلیمی اور پیشہ ورانہ مستقبل سے ہوتا ہے۔