سعودی عرب: رہائشی علاقے پر گولہ گرنے سے 2 افراد جاں بحق ، 12 زخمی

ریاض: سعودی عرب کی الخرج گورنری میں ایک افسوسناک واقعہ پیش آیا ہے جہاں ایک رہائشی مقام پر فوجی گولہ (Military Projectile) گرنے کے نتیجے میں دو غیر ملکی شہری ہلاک  اور 12 افراد زخمی ہو گئے ہیں۔ سول ڈیفنس (الدفاع المدنی) کے  ترجمان کے مطابق یہ واقعہ اتوار 19 رمضان 1447ھ بمطابق 8 مارچ 2026ء کو پیش آیا، جس کے بعد امدادی ٹیموں نے فوری طور پر جائے وقوعہ پر پہنچ کر کارروائی کا آغاز کیا۔

ترجمان نے تفصیلات بتاتے ہوئے کہا کہ گولہ الخرج میں واقع ایک مینٹیننس اور کلیننگ کمپنی کی رہائشی عمارت پر گرا۔ اس حملے کے نتیجے میں دو افراد اپنی جان سے ہاتھ دھو بیٹھے جن کا تعلق بھارت اور بنگلہ دیش سے ہے، جبکہ 12 بنگلہ دیشی شہری زخمی ہوئے ہیں۔ واقعے میں جانی نقصان کے ساتھ ساتھ عمارت اور گردونواح میں بڑے پیمانے پر مالی نقصانات بھی ہوئے ہیں۔

سول ڈیفنس کے بیان میں اس کارروائی کی شدید مذمت کرتے ہوئے کہا گیا ہے کہ شہری آبادی اور سویلین تنصیبات کو نشانہ بنانا بین الاقوامی انسانی قوانین کی سنگین خلاف ورزی ہے۔