ایران میں اسرائیل کے لیے مبینہ جاسوسی، 20 افراد گرفتار

ایران میں اسرائیل کے ساتھ مبینہ تعاون کے الزام میں 20 افراد کو گرفتار کر لیا گیا ہے۔ ایرانی حکام کے مطابق یہ گرفتاریاں ملک کے شمال مغربی علاقے میں کی گئیں جہاں سکیورٹی اداروں نے خفیہ معلومات کی بنیاد پر کارروائی کی۔

ایرانی خبر رساں ایجنسی کے مطابق مغربی آذربائیجان صوبے کے پراسیکیوٹر آفس نے بتایا ہے کہ زیرِ حراست افراد پر الزام ہے کہ وہ ایران کی فوجی اور سکیورٹی تنصیبات سے متعلق حساس معلومات اسرائیل کو فراہم کرنے کی کوشش کر رہے تھے۔ حکام کا کہنا ہے کہ اس معاملے کی مزید تحقیقات جاری ہیں۔

یہ گرفتاریاں ایسے وقت میں سامنے آئی ہیں جب حال ہی میں ایران میں قیادت سے متعلق اہم پیش رفت کی خبریں بھی گردش کر رہی ہیں۔ ذرائع کے مطابق ملک میں سکیورٹی ادارے حساس معلومات کے ممکنہ لیک ہونے کے خدشات کے باعث نگرانی مزید سخت کر رہے ہیں۔

یاد رہے کہ ایران میں اس سے قبل بھی جاسوسی کے الزامات کے تحت متعدد افراد کو گرفتار کیا جا چکا ہے، جبکہ ملکی قوانین کے مطابق اس نوعیت کے سنگین مقدمات میں سخت سزائیں دی جا سکتی ہیں۔ ادھر خطے میں ایران اور اسرائیل کے درمیان بڑھتی کشیدگی کے باعث سکیورٹی صورتحال پر بھی گہری نظر رکھی جا رہی ہے۔