ایرانی وزیرخارجہ کےبیان پر اسحاق ڈار کااظہار تشکر

اسلام آباد: پاکستان کے نائب وزیراعظم اور وزیر خارجہ اسحاق ڈار نے ایرانی وزیر خارجہ عباس عراقچی کا شکریہ ادا کیا ہے اور واضح کیا ہے کہ ایران نے اسلام آباد میں بات چیت سے کبھی انکار نہیں کیا۔

اپنے سوشل میڈیا اکاؤنٹ پر اسحاق ڈار نے لکھا کہ ایرانی وزیر خارجہ نے پاکستان کی ثالثی کی کوششوں کی تعریف کی ہے۔ ایران کا کہنا ہے کہ وہ امریکہ کے ساتھ مذاکرات کے لیے تیار ہے، تاہم مناسب شرائط کے بغیر اس “غیر قانونی جنگ” کا مستقل خاتمہ ممکن نہیں۔

پاکستان نے ایران اور امریکہ کے درمیان حالیہ کشیدگی کو کم کرنے میں اہم کردار ادا کیا ہے اور اپریل 2026 میں اسلام آباد میں دونوں ممالک کے درمیان اعلیٰ سطح کی بات چیت کی میزبانی کر رہا ہے۔

اسحاق ڈار نے زور دیا کہ پاکستان اور ایران کے درمیان دوستی اور بھائی چارے کے تعلقات مضبوط ہیں اور دونوں ممالک علاقائی امن و استحکام کے لیے مشترکہ طور پر کام کر رہے ہیں۔

یہ بیان امریکی میڈیا کی ان رپورٹس کے ردعمل میں سامنے آیا ہے، جن میں دعویٰ کیا گیا تھا کہ ایران نے اسلام آباد میں مذاکرات سے انکار کر دیا ہے۔

ایرانی وزیر خارجہ نے ان خبروں کو مسترد کرتے ہوئے پاکستان کی ثالثی کی کوششوں کی تعریف کی۔