ایرانی اپنے ملک کے پلوں اور بجلی گھروں پر انسانی ڈھال بن گئے

تہران:امریکی صدر ڈونلڈ ٹرمپ کی جانب سے ایران کے بنیادی ڈھانچے کو نشانہ بنانے کی حالیہ دھمکیوں کے بعد، جنوب مغربی شہر اہواز میں سینکڑوں شہریوں نے سڑکوں پر نکل کر یکجہتی کا اظہار کیا۔

ایران کی نیم سرکاری خبر رساں ایجنسی تسنیم کے مطابق، اہواز کے مشہور ‘پولِ سفید’ یا وائٹ برج پر درجنوں افراد جمع ہوئے جنہوں نے ہاتھوں میں ایرانی پرچم اٹھا رکھے تھے۔ سوشل میڈیا پر شیئر کی گئی ویڈیوز میں دیکھا جا سکتا ہے کہ شہری ٹرمپ کی دھمکیوں کے خلاف پرامن احتجاج کر رہے ہیں اور قومی جذبے کا اظہار کر رہے ہیں۔

دوسری جانب ایران اور امریکہ و اسرائیل کے درمیان بڑھتی ہوئی فوجی کشیدگی کے درمیان ایرانی حکام نے ملک بھر کے نوجوانوں، فنکاروں اور طالب علموں سے اپیل کی ہے کہ وہ قومی اثاثوں کی حفاظت کے لیے بجلی گھروں (Power Plants) اور اہم پلوں کے گرد ’انسانی ڈھال‘ بن جائیں۔

🇮🇷🇺🇸🇮🇱⚡️– Iranians have formed a human chain in front of the Kazeroon combined-cycle power plant due to threats of strikes against the facility. pic.twitter.com/YBmuTn1zUb

— MonitorX (@MonitorX99800) April 7, 2026

ایران کے نائب وزیر برائے امورِ نوجوانان علی رضا رحیمی نے سرکاری ٹی وی پر ایک ویڈیو پیغام میں ملک کے نوجوانوں، کھلاڑیوں اور پروفیسرز کو دعوت دی ہے کہ وہ بجلی گھروں کے گرد انسانی زنجیریں بنا کر دنیا کو اتحاد کا پیغام دیں۔

یہ پیش رفت امریکی صدر ڈونلڈ ٹرمپ کے اس حالیہ بیان کے بعد سامنے آئی ہے جس میں انہوں نے دھمکی دی تھی کہ اگر آبنائے ہرمز کو فوری طور پر جہاز رانی کے لیے نہ کھولا گیا تو ایران کے تمام بجلی گھروں اور پلوں کو نشانہ بنایا جائے گا۔