لاہور: کاہنہ نو میں ٹیوشن سینٹر کی چھت گرنے کی وجوہات سامنے آ گئیں

لاہور کے علاقے کاہنہ نو (بستی عیدگاہ) میں ایک نجی ٹیوشن سینٹر کی چھت گرنے سے 14 سے زائد معصوم بچے جاں بحق اور متعدد زخمی ہو گئے ۔ پولیس نے کارروائی کرتے ہوئے ٹھیکیدار، مستری اور مالک مکان سمیت 5 افراد کو حراست میں لے کر فوجداری تحقیقات کا آغاز کر دیا ہے۔

ابتدائی تحقیقات اور عینی شاہدین کے مطابق عمارت کی اوپر والی منزل پر تعمیراتی کام جاری تھا جہاں مزدور اور مستری کام میں مصروف تھے۔ ٹی آئرن اور گارڈرز پر مشتمل پرانی چھت اوپر ہونے والے کام، مزدوروں کی نقل و حرکت اور ناقص میٹیریل کے باعث اچانک وزن نہ سہہ سکی اور زوردار دھماکے سے نیچے پڑھتے ہوئے بچوں پر آ گری۔

ڈی آئی جی آپریشنز لاہور، فیصل کامران نے جائے وقوعہ کا دورہ کیا اور ریسکیو آپریشن کی نگرانی کی۔ میڈیا سے گفتگو کرتے ہوئے انہوں نے تصدیق کی کہ عمارت کے اوپر تعمیراتی کام چل رہا تھا جس کی وجہ سے یہ لرزہ خیز حادثہ پیش آیا۔ پولیس نے فوری ایکشن لیتے ہوئے جائے وقوعہ سے تعمیراتی کام کرنے والے ٹھیکیدار، مستری اور مالک مکان سمیت 5 سے زائد افراد کو گرفتار کر لیا ہے اور ان کے خلاف غفلت و لاپرواہی کی دفعات کے تحت مقدمہ درج کیا جا رہا ہے۔

دوسری جانب وزیراعلیٰ پنجاب مریم نواز نے واقعے کا سخت نوٹس لیتے ہوئے کمشنر لاہور سے فوری رپورٹ طلب کر لی ہے اور صوبے بھر میں غیر قانونی عمارات اور اسکولوں کی فٹنس کا جائزہ لینے کا حکم جاری کیا ہے۔ انتظامیہ کا کہنا ہے کہ شفاف تحقیقات کے ذریعے ذمہ داران کو سخت ترین سزا دی جائے گی۔

ڈاکٹرز کے مطابق اں بحق ہونے والے زیادہ تر بچوں کی موت ملبے تلے دم گھٹنے اور گہرے زخموں کے باعث ہوئی۔ زخمیوں میں ایک خاتون ٹیچر بھی شامل ہیں۔