آزاد کشمیر انتخابات: ایل اے 14غربی باغ-1 میں بڑا اپ سیٹ، ساجد اقبال نے سردار عتیق کو شکست دیدی

باغ :آزاد کشمیر انتخابات کے تیسرے مرحلے کیلئے باغ اور حویلی میں پولنگ کا وقت ختم ہو گیا جب کہ ووٹوں کی گنتی شروع کردی گئی۔

آزاد جموں و کشمیر کے حلقہ ایل اے 14 باغ 1، ایل اے 15 باغ 2 ، ایل اے 16 باغ 3 اور حلقہ ایل اے 17 باغ 4 حویلی میں پولنگ ہوئی۔ پولنگ کا عمل صبح 8 بجے سے شام 5 بجے تک جاری رہا۔

حلقہ ایل اے14 باغ 1

214 پولنگ اسٹیشنز میں سے 212 کے غیر حتمی و غیر سرکاری نتائج میں عوامی دست و بازو کے ساجد اقبال 40309 ووٹ لے کر پہلے نمبر پر جبکہ مسلم کانفرنس کے سردار عتیق احمد خان 21210 ووٹ کے ساتھ دوسرے نمبر پر ہیں۔

ایل اے 15 باغ 2

213 پولنگ اسٹیشنز میں سے 45 کے غیر حتمی و غیر سرکاری نتائج کے مطابق پیپلزپارٹی کے ضیاء قمر 5200 ووٹ لے کر پہلے نمبر پر ہیں جبکہ مسلم لیگ (ن) کے محمد مشتاق احمد منہاس 2244 ووٹ کے ساتھ دوسرے نمبر پر ہیں۔

ایل اے 16 باغ 3

186 پولنگ اسٹیشنز میں سے 84 کے غیر حتمی و غیر سرکاری نتائج کے مطابق مسلم لیگ (ن) کے سردار میر اکبر خان 9243 ووٹ لے کر آگے ہیں جبکہ پیپلزپارٹی کے سردار قمر زمان خان 7144 ووٹ کے ساتھ دوسرے نمبر پر ہیں۔

ایل اے 17 باغ 4

ایل اے 17 باغ 4 کے 199 پولنگ اسٹیشنز میں سے 125 کے غیرحتمی و غیر سرکاری نتائج آگئے جس کے مطابق پیپلز پارٹی کے راجہ فیصل ممتاز راٹھور 23470 ووٹوں کے ساتھ  آگے جبکہ مسلم لیگ (ن) کے چوہدری محسن عزیز17443 ووٹ لے کر دوسرے نمبر پر ہیں۔

حلقے کے مختلف پولنگ اسٹیشنز سے نتائج کی آمد کا سلسلہ جاری ہے اور آزاد و منصفانہ عمل کے تحت ووٹوں کی گنتی کا کام مکمل کیا جا رہا ہے۔ نوجوان امیدوار ساجد اقبال عباسی کی برتری کی خبر سامنے آتے ہی ان کے حامیوں اور کارکنان میں خوشی کی لہر دوڑ گئی ہے اور دفاتر کے باہر جشن کا ماحول ہے۔

سیاسی مبصرین کے مطابق ایل اے 14 باغ میں روایت پسند اور تجربہ کار قیادت کے سامنے ایک نوجوان امیدوار کا برتری حاصل کرنا آزاد کشمیر کی مقامی سیاست میں اہم تحرک اور تبدیلی کا اشارہ دے رہا ہے۔ انتخابی عملے کے مطابق تمام پولنگ اسٹیشنز کے مکمل اور حتمی سرکاری نتائج کا باضابطہ اعلان الیکشن کمیشن کی جانب سے تمام مرحلہ وار گنتی مکمل ہونے کے بعد کیا جائے گا۔

تیسرے مرحلے کے الیکشن میں کل 82 امیدوار میدان میں ہیں، پاکستان مسلم لیگ ن اور پیپلز پارٹی میں کانٹے کا مقابلہ متوقع ہے۔

چیف الیکشن کمشنر کے مطابق پونچھ اور سدھنوتی کے حلقوں میں انتخابات مؤخر کر دیئے گئے ہیں۔

واضح رہے کہ آزاد جموں و کشمیر الیکشن کے پہلے مرحلے میں میرپور ڈویژن کی 13 میں سے 9 نشستوں پر مسلم لیگ (ن) کامیاب ہوئی تھی، جبکہ پیپلز پارٹی نے 4 سیٹوں پر میدان مارا، جبکہ دوسرے مرحلے میں مظفر آباد ڈویژن کی 9 اور مہاجرین کی 12 نشستوں پر انتخاب ہوا، جن میں سے مسلم لیگ (ن) 15 اور پیپلز پارٹی 6 نشستوں پر کامیاب قرار پائی۔