غزہ کی صورتحال پر مذاکرات، خلیل الحیہ قاہرہ پہنچ گئے

حماس کے سیاسی رہنما اور چیف مذاکرات کار خلیل الحیہ غزہ کی صورتحال پر بات چیت کے لیے مصر کے دارالحکومت قاہرہ پہنچ گئے ہیں۔

حماس کے ذرائع کے مطابق خلیل الحیہ اپنے دورے کے دوران مصری حکام سے ملاقاتیں کریں گے، جبکہ اتوار کو ان کی مصر کی انٹیلی جنس سروس کے سربراہ حسن رشاد سے ملاقات متوقع ہے۔

جولائی کے اواخر میں حماس کی قیادت سنبھالنے کے بعد یہ خلیل الحیہ کا مصر کا پہلا دورہ ہے۔ ان کے دورے کو غزہ کی صورتحال اور جنگ بندی سے متعلق سفارتی کوششوں کے تناظر میں اہم قرار دیا جا رہا ہے۔

خلیل الحیہ کا دورہ امریکی صدر ڈونلڈ ٹرمپ کے داماد جیرڈ کشنر کے متوقع مشرق وسطیٰ کے دورے سے قبل ہو رہا ہے۔ جیرڈ کشنر آئندہ ہفتے اسرائیل اور مصر جائیں گے، جہاں غزہ سے متعلق ایک منصوبے پر فریقین کے درمیان اختلافات کم کرنے کی کوشش کی جائے گی۔

تاہم اسرائیلی وزیراعظم بنیامین نیتن یاہو پہلے ہی مذکورہ منصوبے کو مسترد کرچکے ہیں۔

غزہ کے لیے اقوام متحدہ کے امن مندوب نکولائی ملاڈینوف بھی جیرڈ کشنر کے ہمراہ خطے کا دورہ کریں گے۔ ان سفارتی سرگرمیوں کو غزہ میں جاری صورتحال کے حل اور مذاکراتی عمل کو آگے بڑھانے کی کوششوں کا حصہ قرار دیا جا رہا ہے۔