ایران نے آبنائے ہرمز میں متحدہ عرب امارات سے منسلک آئل ٹینکر روک لیا

ایران نے آبنائے ہرمز سے گزرنے والے متحدہ عرب امارات سے منسلک ایک آئل ٹینکر کو روک لیا ہے۔ ایرانی میڈیا کے مطابق بحری جہازوں کی نقل و حرکت سے متعلق اعداد و شمار میں ٹینکر کو روکے جانے کی نشاندہی ہوئی ہے۔

رپورٹس کے مطابق مذکورہ آئل ٹینکر ایک ایسی کمپنی کی ملکیت ہے جو متحدہ عرب امارات میں قائم ہے۔ جہاز آبنائے ہرمز سے گزر رہا تھا اور قشم جزیرے کے قریب اسے روکنے کی اطلاعات سامنے آئی ہیں۔

ایرانی ذرائع کے مطابق ٹینکر آبنائے ہرمز سے گزرنے والے بحری جہازوں کے لیے ایران کی جانب سے مقرر کیے گئے مخصوص بحری راستے کو استعمال کررہا تھا۔

ایرانی مؤقف کے مطابق آبنائے ہرمز میں بحری جہازوں کی محفوظ آمدورفت کے لیے ایک مخصوص انتظام موجود ہے، جس کے تحت جہازوں کو مقررہ راستہ اختیار کرنا، متعلقہ خدمات کی فیس ادا کرنا اور ایرانی حکام سے ضروری اجازت حاصل کرنا ہوتی ہے۔

تاہم تاحال یہ واضح نہیں ہوسکا کہ ٹینکر کو روکنے کی اصل وجہ کیا تھی اور اسے کتنی دیر تک روکا گیا ہے۔

ایرانی میڈیا نے جہاز پر موجود عملے کی تعداد، ان کی قومیت یا موجودہ صورتحال کے بارے میں بھی مزید تفصیلات جاری نہیں کیں۔

آبنائے ہرمز دنیا کے اہم ترین بحری تجارتی راستوں میں شمار ہوتا ہے اور یہاں کسی بھی بحری جہاز کو روکے جانے کا واقعہ عالمی توانائی اور تیل کی منڈی کے لیے اہم سمجھا جاتا ہے۔

واقعے کی مزید تفصیلات اور ایرانی حکام کی جانب سے باضابطہ وضاحت سامنے آنے کا انتظار ہے۔