ایران جنگ کے دوران چینی تیل کمپنی سینوپیک کے منافع میں نمایاں اضافہ

مشرق وسطیٰ میں جاری کشیدگی، عالمی سطح پر خام تیل کی قیمتوں میں اتار چڑھاؤ اور چین میں ایندھن کی طلب میں کمی کے باوجود چینی توانائی کمپنی سینوپیک نے 2026 کی پہلی ششماہی میں منافع میں نمایاں اضافہ ریکارڈ کیا ہے۔

کمپنی کی شنگھائی اسٹاک ایکسچینج میں جمع کرائی گئی مالی رپورٹ کے مطابق جنوری سے جون کے دوران چینی اکاؤنٹنگ معیار کے تحت خالص منافع 25.63 ارب یوان رہا، جو گزشتہ سال کی اسی مدت کے 21.48 ارب یوان کے مقابلے میں 19.3 فیصد زیادہ ہے۔

تاہم خام تیل کی قیمتوں میں شدید اتار چڑھاؤ کے باعث کمپنی نے تقریباً 16 ارب یوان کے اثاثہ جاتی نقصانات کے لیے رقم مختص کی۔ مشرق وسطیٰ کی صورتحال سینوپیک کے لیے خاص اہمیت رکھتی ہے کیونکہ کمپنی اپنی خام تیل کی ضروریات کا ایک بڑا حصہ خطے سے حاصل کرتی ہے۔

آبنائے ہرمز میں پیدا ہونے والی سپلائی کی صورتحال نے خام تیل کی خریداری کو مزید مشکل بنایا، تاہم کمپنی نے مختلف ذرائع سے خام تیل حاصل کرنے اور خریداری کے اوقات کو مارکیٹ کی صورتحال کے مطابق تبدیل کرکے دباؤ کم کرنے کی کوشش کی۔

رپورٹ کے مطابق جنوری سے جون کے دوران سینوپیک نے گزشتہ سال کے مقابلے میں 5.6 فیصد کم خام تیل پراسیس کیا۔ مجموعی مقدار 113.31 ملین میٹرک ٹن رہی، جو تقریباً 4.57 ملین بیرل یومیہ کے برابر بنتی ہے۔

کمپنی کے ریفائننگ مارجن میں 44.1 فیصد اضافہ ہوا اور یہ 453 یوان فی میٹرک ٹن تک پہنچ گیا، جبکہ ریفائننگ شعبے کے آپریٹنگ منافع میں غیر معمولی طور پر 381.5 فیصد اضافہ ریکارڈ کیا گیا۔

سینوپیک انتظامیہ کے مطابق عالمی خام تیل کی قیمتوں میں اتار چڑھاؤ اور درآمدی تیل کی بڑھتی لاگت کے باوجود کمپنی نے پیداوار اور کاروباری حکمت عملی میں بروقت تبدیلیاں کرکے مختلف چیلنجز کا مقابلہ کیا۔

دوسری جانب کمپنی کا کیمیکل شعبہ اب بھی خسارے میں ہے، تاہم اس شعبے کے آپریٹنگ خسارے میں تقریباً 4 ارب یوان کی کمی آئی۔ ایتھیلین کی پیداوار بھی 15.5 فیصد کم ہوکر 6.4 ملین ٹن رہ گئی، جس کی بڑی وجوہات میں اضافی پیداواری صلاحیت اور نجی کمپنیوں کی جانب سے بڑھتا ہوا مقابلہ شامل ہے۔