کرسٹیانو رونالڈو کو گول چرانے کے الزام اور قومی کیمپ چھوڑنے پر ممکنہ پابندی کا سامنا

عالمی شہرت یافتہ پرتگالی فٹبالر کرسٹیانو رونالڈو کو ایک طرف سعودی پرو لیگ میں ساتھی کھلاڑی کا گول چرانے کے الزامات کا سامنا ہے تو دوسری طرف قومی ٹیم کا کیمپ چھوڑنے پر ان پر پابندی لگائے جانے کا امکان ظاہر کیا گیا ہے۔ غیر ملکی میڈیا رپورٹس کے مطابق سعودی پرو لیگ میں الریاض کے خلاف النصر کی 0-3 سے کامیابی کے دوران کرسٹیانو رونالڈو نے کیریئر کا 980 واں گول اسکور کیا۔ تاہم میچ کی ویڈیو سامنے آنے کے بعد سوشل میڈیا پر بحث چھڑ گئی کہ رونالڈو نے ساتھی کھلاڑی سادیو مانے کا گول چوری کر لیا ہے۔ میچ کے 23 ویں منٹ میں کنگسلے کومان کے شاٹ کو گول کیپر ولید عبداللہ نے روکنے کی کوشش کی لیکن گیند کے واپس آنے پر رونالڈو نے تیزی سے اسے جال میں پہنچا دیا اور اپنا مخصوص ’سیووو‘ جشن منایا۔ البتہ مانے کے لیے اطمینان کی بات یہ تھی کہ وہ بظاہر آف سائیڈ پوزیشن پر موجود تھے اور اگر وہ خود گیند کو گول میں پہنچا بھی دیتے تو اسے مسترد کر دیا جاتا۔

دوسری جانب پرتگال سے تعلق رکھنے والے فٹبالر کو قومی ٹیم کے کیمپ سے ناراض ہو کر جانے پر پابندی کا بھی سامنا ہے۔ میڈیا رپورٹس کے مطابق کوچ جارج جیسز کے ساتھ کھیلنے کے وقت پر اختلافات کے بعد رونالڈو نے ٹیم کا کیمپ چھوڑ دیا تھا جس پر پرتگالی فٹبال فیڈریشن کے ضوابط کے تحت کارروائی شروع کی گئی۔ رپورٹس کے مطابق پابندی کی مدت 1 سے 6 ماہ تک ہوسکتی ہے جس کا حتمی فیصلہ ڈسپلنری کونسل کرے گی۔ اگر پابندی 1 ماہ سے زائد ہوئی تو رونالڈو اگلے ماہ ڈنمارک اور ویلز کے خلاف نیشنز لیگ کے میچز سے محروم ہوسکتے ہیں۔ فٹبالر نے اپنے بیان میں قومی ٹیم کے ساتھی کھلاڑیوں اور پرتگالی عوام سے معذرت کرتے ہوئے تسلیم کیا کہ کیمپ چھوڑنا ان کی غلطی تھی۔ انہوں نے مؤقف اپنایا کہ کوچ کے وعدے سے انحراف نے انہیں مایوس کیا لیکن قوانین سب کے لیے یکساں ہونے چاہئیں۔ دوسری طرف کوچ جارج جیسز نے کہا ہے کہ انہوں نے رونالڈو کا بیان پڑھ لیا ہے اور اب ان کی توجہ ٹیم کے امور پر مرکوز ہے۔