ریاض ایئرپورٹ پر حملے کے بعد ٹرمپ کا حوثیوں کے خلاف سعودی کارروائی میں شمولیت پر غور

امریکی صدر ڈونلڈ ٹرمپ نے کہا ہے کہ وہ ریاض کے بین الاقوامی ہوائی اڈے پر حملے کے بعد حوثیوں کے خلاف سعودی عرب کی فوجی کارروائیوں میں امریکہ کی شمولیت کے معاملے پر جلد فیصلہ کریں گے۔

ان کا کہنا تھا کہ انہیں حالیہ حملے کے بارے میں ابھی معلوم ہوا ہے اور ہم اس معاملے کا جائزہ لیں گے، اس حوالے سے فیصلہ جلد کیا جائے گا۔ امریکہ بہت تیزی سے فیصلے کرتا ہے۔

واضح رہے کہ سعودی عرب کے دارالحکومت ریاض میں کنگ خالد انٹرنیشنل ایئرپورٹ پر ہونے والے اس حملے کے نتیجے میں کم از کم 5 افراد زخمی ہوگئے ہیں، جنھیں فوری طور پر انتہائی نگہداشت کے وارڈ میں منتقل کر کے طبی امداد فراہم کی جا رہی ہے۔

یمن میں سرگرم حوثی گروپ کو مبینہ طور پر ایران کی حمایت حاصل ہے۔ سعودی عرب اور حوثیوں کے درمیان جاری کشیدگی کی وجہ سے خطے میں سلامتی کی مجموعی صورت حال مزید پیچیدہ ہونے کا خدشہ ظاہر کیا جا رہا ہے۔ ریاض ایئرپورٹ پر حملے کے بعد امریکی صدر کا یہ اہم بیان ایسے وقت میں سامنے آیا ہے جب مشرقِ وسطیٰ میں علاقائی کشیدگی اور سکیورٹی کے امور مرکزی موضوع بنے ہوئے ہیں۔