وفاقی آئینی عدالت نے 190 ملین پاؤنڈ کیس میں بشریٰ بی بی کی سزا معطلی پر اپیل مسترد ہونے کا تحریری فیصلہ جاری کردیا۔ 

چیف جسٹس امین الدین خان نے 3 صفحات پر مشتمل فیصلہ تحریر کیا، جس میں کہا گیا کہ بشریٰ بی بی کی سزا معطلی کی اپیل مسترد کی جاتی ہے۔

وفاقی آئینی عدالت نے فیصلہ دیا کہ اپیل 61 دن کی تاخیر سے دائر کی گئی تھی، متفرق درخواست کے ذریعے استدعا کی گئی کہ تاخیر کا معاملہ درگزر کیا جائے۔

عدالت نے فیصلے میں لکھا کہ تاخیر سے اپیل دائر کرنے کی وجہ بشریٰ بی بی کی اڈیالہ جیل قید بتائی گئی، 61 دن کی تاخیر کو نظرانداز کیا جاتا ہے۔

وفاقی آئینی عدالت نے قرار دیا کہ اسلام آباد ہائیکورٹ کے 30 اپریل کے حکم کو چیلنج کیا گیا۔ سلمان صفدر نے میاں نواز شریف کیس کا حوالہ دیا۔ اسلام آباد ہائیکورٹ میں مرکزی اپیل پہلے مقرر کی جاچکی ہے۔

عدالت نے فیصلے میں تحریر کیا کہ متوازی جائزے کے بجائے مرکزی اپیل کے فیصلے کو جلد یقینی بنایا جائے۔ وفاقی آئینی عدالت اس سطح پر مناسب سمجھتی ہے کہ مداخلت نہ کی جائے۔

فیصلے میں یہ بھی کہا گیا کہ توقع ہے کہ ہائیکورٹ مرکزی اپیل پر جلد فیصلہ کرے گی۔ امید ہے اسلام آباد ہائیکورٹ غیرضروری التوا کی حوصلہ شکنی کرے گی۔