عمران خان سمیت تمام قیدیوں کو نئی ماڈل جیل منتقل کیا جائے گا، عطا تارڑ

وفاقی وزیر اطلاعات عطا تارڑ نے کہا ہے کہ بانی پاکستان تحریک انصاف سمیت تمام قیدیوں کو اسلام آباد کی نئی ماڈل جیل میں منتقل کیا جائے گا۔ وزیر اطلاعات نے میڈیا سے گفتگو کرتے ہوئے واضح کیا کہ اسلام آباد ماڈل جیل کے مکمل فعال ہونے کے بعد متعلقہ انتظامیہ اس امر کا حتمی فیصلہ کرے گی۔

دوسری جانب وزیر داخلہ محسن نقوی نے بھی اسلام آباد ماڈل جیل کا دورہ کیا اور تعمیراتی کام کا جائزہ لیا۔ اس موقع پر گفتگو کرتے ہوئے وزیر داخلہ نے تصدیق کی کہ ماڈل جیل کا منصوبہ مکمل ہو چکا ہے اور افتتاحی تقریب کے بعد قیدیوں کی منتقلی کے مراحل کا آغاز کر دیا جائے گا۔

ادھر پاکستان تحریک انصاف کے چیئرمین بیرسٹر گوہر علی خان نے سیاسی مسائل کے حل کے لیے حکومت کے ساتھ بامقصد مذاکرات پر زور دیا ہے۔ ان کا کہنا تھا کہ سیاسی کشیدگی کم کرنے کے لیے بات چیت ہی واحد راستہ ہے۔ انہوں نے مزید مطالبہ کیا کہ بانی پی ٹی آئی سے ملاقاتوں کی طویل بندش کا خاتمہ ہونا چاہیے کیونکہ اس سے سیاسی عمل میں مزید پیچیدگیاں پیدا ہو رہی ہیں۔