کرپٹو کرنسی کے عوض ایران کے لیے جاسوسی، اسرائیلی فوجی پر فردِ جرم عائد

اسرائیل میں ایک حاضر سروس فوجی اہلکار پر ایرانی انٹیلی جنس کے لیے جاسوسی کرنے اور حساس فوجی معلومات فراہم کرنے کے الزام میں فردِ جرم عائد کر دی گئی ہے۔ اسرائیلی حکام کے مطابق ملزم کو مبینہ طور پر خفیہ معلومات کے بدلے کرپٹو کرنسی میں ادائیگیاں کی جاتی رہیں۔

اسرائیلی سکیورٹی ادارے شن بیٹ، پولیس اور ملٹری پولیس کی مشترکہ تحقیقات کے مطابق فوجی اہلکار کو ستمبر میں گرفتار کیا گیا تھا۔ حکام کا کہنا ہے کہ وہ تقریباً ایک سال تک ایرانی ایجنٹس کے رابطے میں رہا اور اس دوران اپنی فوجی یونٹ کی سرگرمیوں، تیاریوں، ہنگامی نقل و حرکت اور تعیناتی سے متعلق حساس معلومات فراہم کرتا رہا۔

استغاثہ کے مطابق ملزم نے مبینہ طور پر فوجی اڈوں کے مقامات اور ان کے جغرافیائی نقاط، میزائل دفاعی نظام، فوجی گاڑیوں اور اسرائیل میں موجود امریکی فضائیہ کے ری فیولنگ طیاروں کی تصاویر اور تفصیلات بھی ایرانی رابطہ کاروں کو بھیجیں۔

تحقیقات میں یہ بات بھی سامنے آئی کہ ملزم نے اپنے ساتھی فوجیوں اور کمانڈروں سے متعلق معلومات فراہم کیں، جنہیں ایرانی ایجنٹس مزید افراد کو جاسوسی کے لیے بھرتی کرنے کی غرض سے استعمال کرنا چاہتے تھے۔

اسرائیلی حکام کے مطابق ایرانی رابطہ کار نے فوجی اہلکار کو خفیہ رابطوں کے لیے انکرپٹڈ ایپس استعمال کرنے کی ہدایت کی تھی۔ دونوں کے درمیان خفیہ کوڈز اور ایک فرضی کہانی تیار کرنے پر بھی اتفاق ہوا تھا تاکہ جاسوسی سرگرمیاں سامنے آنے کی صورت میں بچاؤ کیا جا سکے۔ ملزم کو مبینہ طور پر ایران منتقل ہونے کے لیے 2 لاکھ ڈالر کی پیشکش بھی کی گئی تھی۔

اسرائیلی فوجی عدالت نے ملزم کی حراست میں 12 نومبر 2026 تک توسیع کر دی ہے۔ اس پر دشمن کو ریاستی سلامتی کو نقصان پہنچانے کی نیت سے معلومات فراہم کرنے، دشمن کے فائدے کے لیے معلومات منتقل کرنے اور غیر ملکی ایجنٹ سے رابطے سمیت سنگین الزامات عائد کیے گئے ہیں۔ تاہم ان الزامات کا عدالت میں ثابت ہونا ابھی باقی ہے۔

اسرائیلی حکام نے اس واقعے کو ایران کی جانب سے سوشل میڈیا اور دیگر ذرائع کے ذریعے اسرائیلی شہریوں اور فوجی اہلکاروں کو جاسوسی کے لیے بھرتی کرنے کی کوششوں سے جوڑتے ہوئے عوام کو مشکوک افراد کی جانب سے رقم یا کام کی پیشکشوں کے ذریعے معلومات حاصل کرنے کی کوششوں سے خبردار کیا ہے۔