امریکا اور ایران کے درمیان جنگ میں نئی شدت زیادہ تباہ کن ہوسکتی ہے، مصر کی وارننگ

منامہ ڈائیلاگ سکیورٹی سمٹ سے خطاب کرتے ہوئے مصر کے وزیر خارجہ بدر عبدالعاطی نے خبردار کیا ہے کہ امریکا اور ایران کے درمیان جنگ میں دوبارہ کشیدگی بڑھی تو اس کے نتائج پہلے سے زیادہ تباہ کن ہوسکتے ہیں اور پورا خطہ اس کے سنگین اثرات کی زد میں آسکتا ہے۔ خبر رساں اداروں کے مطابق مصری وزیر خارجہ کا کہنا تھا کہ وہ اس تنازع میں کشیدگی کے ایک نئے دور کے امکان پر انتہائی فکر مند ہیں۔

ان کے مطابق اگر امریکا اور ایران کے درمیان دوبارہ فوجی تصادم شدت اختیار کرتا ہے تو اس کے اثرات وسیع پیمانے پر مرتب ہوں گے۔ یہ بیان ایسے وقت میں سامنے آیا ہے جب مشرقِ وسطیٰ میں سفارتی کوششیں جاری ہیں اور خطے کے ممالک کو خدشہ ہے کہ لڑائی میں دوبارہ شدت آنے سے سلامتی، معیشت، توانائی کی ترسیل اور علاقائی استحکام شدید متاثر ہوسکتا ہے۔

دریں اثنا، افغانستان سے ہونے والی دہشتگردی پر گفتگو کرتے ہوئے امریکی حکام نے پاکستان کی حمایت کا اعادہ کیا ہے۔ امریکی مؤقف کے مطابق پاکستان کا یہ مؤقف درست ہے کہ افغان طالبان نے اپنی سرزمین سے ہونے والے دہشت گرد حملوں کو روکنے کے لیے مؤثر اقدامات نہیں کیے، اور امریکا نہیں چاہتا کہ پاکستان دہشت گردی کا نشانہ بنے۔

دوسری جانب یوکرین جنگ کے حوالے سے بتایا گیا ہے کہ امریکا ایک انتہائی تباہ کن جنگ کو روکنے اور امن کے لیے قابل عمل راستہ تلاش کرنے کی کوشش کر رہا ہے۔ کیف میں توانائی کے بنیادی ڈھانچے پر حملے جاری ہیں اور فریقین کو شدید جانی و مالی نقصان کا سامنا ہے۔