والدین کے خواب پورے کرنے والے طلبہ انعام کے مستحق ہیں، مریم نواز

وزیراعلیٰ پنجاب مریم نواز نے کہا ہے کہ والدین کے خوابوں کو حقیقت میں بدلنے والے محنتی طلبہ انعام اور حوصلہ افزائی کے مستحق ہیں۔ حکومت نوجوانوں کی تعلیم اور ترقی کے لیے مختلف سہولتیں فراہم کر رہی ہے۔

جہلم میں لیپ ٹاپ اور ہونہار اسکالرشپس تقسیم کرنے کی تقریب سے خطاب کرتے ہوئے مریم نواز کا کہنا تھا کہ وہ ہونہار طلبہ کو ان کی محنت کا صلہ دینے آئی ہیں۔ ان کے مطابق طلبہ کو جدید تعلیمی سہولتوں کے ساتھ برقی تحفظ بھی فراہم کیا جائے گا، جبکہ پنجاب بھر میں ایک لاکھ سے زائد اسکوٹیز تقسیم کرنے کا منصوبہ ہے۔

وزیراعلیٰ نے کہا کہ آج کے ہیرو اور سپر ہیرو ہونہار طلبہ ہیں، جنہوں نے اپنی محنت اور کوششوں سے کامیابی حاصل کی۔ بچوں کی کامیابی پر ان کے والدین بھی اتنے ہی خوش ہیں، اس لیے والدین کی قربانیوں اور محنت کو بھی سراہنا ضروری ہے۔

انہوں نے بتایا کہ جہلم کی سرکاری یونیورسٹی کے 115 طلبہ اور نرسنگ کالج کی 42 طالبات میں لیپ ٹاپ تقسیم کیے گئے، جبکہ 109 طلبہ کو تقریباً 25 لاکھ روپے کے ہونہار اسکالرشپس دیے گئے۔ مریم نواز کا کہنا تھا کہ لیپ ٹاپ، فون اور اسکالرشپس طلبہ کا حق اور ان کی محنت کا صلہ ہیں۔

مریم نواز نے کہا کہ پنجاب حکومت نوجوانوں کی کامیابیوں اور خوشیوں میں شریک ہے اور وہ بچوں کی کامیابیوں کو ایک ماں کی طرح مناتی ہیں۔ انہوں نے وزیر تعلیم رانا سکندر حیات کی طلبہ کے لیے کوششوں کو بھی سراہا۔

وزیراعلیٰ کے مطابق پنجاب کے 50 ہزار سرکاری اسکولوں کے معیار کو بہتر بنانے پر کام جاری ہے تاکہ انہیں نجی تعلیمی اداروں کے ہم پلہ بنایا جا سکے۔ ان کا کہنا تھا کہ اٹک میں قائم سرکاری نواز شریف اسکول کا معیار مہنگے نجی اسکولوں سے بہتر ہے، جبکہ صوبے کے 40 شہروں میں اسی معیار کے اسکول قائم کیے جا رہے ہیں۔

انہوں نے کہا کہ تعلیم پر سرمایہ کاری دراصل ملک کے مستقبل پر سرمایہ کاری ہے، کیونکہ ہر بچہ پاکستان کا مستقبل ہے۔ حکومت چاہتی ہے کہ نوجوان اپنی صلاحیتوں کے ذریعے ملک کا نام روشن کریں۔

مریم نواز نے طلبہ کے لیے مفت سفری سہولتوں کا ذکر کرتے ہوئے کہا کہ نوجوان گرین بسوں میں مفت سفر کرسکتے ہیں۔ لاہور، راولپنڈی، جہلم اور پنجاب کے دیگر شہروں سمیت خوشاب، لیہ، بھکر، رحیم یار خان، بہاولپور اور ملتان میں بھی یہ سہولت فراہم کی جا رہی ہے۔

ان کا کہنا تھا کہ ترقیاتی منصوبوں کے ثمرات بڑے شہروں تک محدود رکھنے کے بجائے چھوٹے شہروں تک پہنچائے جا رہے ہیں۔ گزشتہ دو برس میں پنجاب بھر میں 50 ہزار کلومیٹر سڑکیں تعمیر کی گئیں اور دیگر شہروں میں سڑکوں کی تعمیر پر خصوصی توجہ دی گئی۔

وزیراعلیٰ نے بتایا کہ جہلم میں دل کے مریضوں کی تشخیص اور علاج کے لیے جدید کارڈیک لیب قائم کی گئی ہے، جبکہ پنجاب کے 25 شہروں میں دل کے علاج کی سہولتیں فراہم کی جا رہی ہیں۔ اس کے علاوہ ہر ڈویژنل ہیڈکوارٹر میں کینسر اسپتال بنانے اور لاہور میں ملک کا پہلا سرکاری کینسر اسپتال تعمیر کرنے کا منصوبہ بھی جاری ہے۔

تقریب کے دوران اسکوٹیز حاصل کرنے والی طالبات کو ہدایت کرتے ہوئے مریم نواز نے کہا کہ وہ اپنی حفاظت کے لیے ہیلمٹ لازمی پہنیں۔ طالبات کو مکمل ڈرائیونگ تربیت بھی فراہم کی جائے گی تاکہ وہ محفوظ طریقے سے سفر کرسکیں۔ انہوں نے بتایا کہ اسکوٹیز کی بڑی تعداد تیار ہونے کے باعث تقسیم میں تاخیر ہوئی، تاہم جلد ان کی تقسیم شروع کردی جائے گی۔

مریم نواز نے نوجوانوں پر زور دیا کہ وہ گمراہ کن باتوں کے بجائے حقائق پر توجہ دیں اور اپنی صلاحیتوں اور کامیابیوں سے ملک کی ترقی میں حصہ ڈالیں۔ ان کا کہنا تھا کہ وہ نوجوانوں کے ہاتھوں میں پاکستان کا پرچم دیکھنا چاہتی ہیں۔