انتخابی پوسٹرزمیں آرمی چیف کی تصاویرلگانےپرپی ٹی آئی امیدوار سے جواب طلب

قومی اسمبلی کے حلقہ این اے 80 گوجرانوالہ تحریک انصاف کے امیدوار صوبائی اسمبلی ناصر چیمہ الیکشن کمیشن میں پیش ہوئے۔

چیف الیکشن کمشنر نے ناصر چیمہ سے پوچھا کہ کس بنیاد پر آپ نے چیف جسٹس اورآرمی چیف کی تصاویر لگائیں؟ آرمی چیف اور چیف جسٹس کا انتخابات سے کیا تعلق ہے ؟ کیا وہ آپ کے رشتہ دار ہیں؟

امیدوارتحریک انصاف ناصر چیمہ نے کہا کہ یہ اشتہار اور پوسٹرز الیکشن شیڈول جاری ہونے سے پہلے لگائے تھے۔

چیف الیکشن کمشنر سردار محمد رضا نے کہا کہ اشتہار جب بھی لگائے گئے، آپ یہ بتائیں کہ کیوں لگائے گئے؟۔ الیکشن کمیشن نے امیدوار تحریک انصاف ناصر چیمہ سے تحریری جواب طلب کرتے ہوئے کہا کہ کیوں نہ آپ کو عام انتخابات میں نااہل کردیا جائے۔ الیکشن کمیشن نے کیس کی سماعت نو جولائی تک ملتوی کردی۔