حسین لوائی کوعدالتی ریمانڈ پر جیل بھیج دیا گیا

کراچی کی مقامی عدالت نے نجی بینک کےسربراہ حسین لوائی کےریمانڈ میں توسیع کی ایف آئی اے کی جانب سے دائر درخواست مسترد کرتے ہوئے ملزم کو 14 روز کے لیے جیل بھجوادیا۔
تفصیلات کے مطابق جوڈیشل مجسٹریٹ جنوبی کراچی کی عدالت میں نجی بینک منی لانڈرنگ کیس کی سماعت ہوئی۔
ایف آئی اے نےسابق صدر آصف علی زرداری کے قریبی دوست حسین لوائی اورطہٰ رضا کوعدالت میں پیش کیا۔
تفتیشی افسر نے موقف اختیار کیا کہ اربوں روپے کی منی لانڈرنگ کے لیے 47 اکاؤنٹس استعمال کئے گئے بینیفشریزاور دیگر معاملات کی تحقیقات کے لیے مزید جسمانی ریمانڈ درکارہے۔ اس لئے ان کے جسمانی ریمانڈ میں مزید توسیع کی اجازت دی جائے۔ جب کہ ملزمان کے وکلا نے اپنے موکلین کو جوڈیشل ریمانڈ پر جیل بھیجنے کی درخواست کی۔
عدالت نے ایف آئی اے کی جانب سے ریمانڈ میں مزید توسیع کی درخواست مسترد کرتے ہوئے دونوں ملزمان کو 14 روز کے لیے جیل بھجوادیا۔
واضح رہے کہ حسین لوائی اور طہٰ رضا پر اربوں روپے کی منی لانڈرنگ کا الزام ہے۔ حسین لوائی پاکستان اسٹاک ایکسچینج کے چیئرمین اور نجی بینک کے سربراہ ہونے کے علاوہ آصف زرداری کے قریبی دوست بھی سمجھے جاتے ہیں۔