سپریم کورٹ نےڈی جی نیب لاہور کی جعلی ڈگری کا کیس ڈی لسٹ کردیا

اسلام آباد: سپریم کورٹ نے ڈی جی نیب لاہور شہزاد سلیم کی جعلی ڈگری کا کیس ڈی لسٹ کردیا۔
سپریم کورٹ نے قومی احتساب بیورو (نیب) لاہور کے ڈائریکٹر جنرل شہزاد سلیم کی جعلی ڈگری سے متعلق کیس 12 نومبر کو سماعت کے لیے مقرر کیا تھا اور چیف جسٹس میاں ثاقب نثار کی سربراہی میں 3 رکنی بنچ نے اس کی سماعت کرنی تھی۔ تاہم اب یہ کیس ڈی لسٹ کر دیا گیا ہے۔ رجسٹرار سپریم کورٹ نے درخواست گزار اسد کھرل کو جاری کردہ سماعت میں پیش ہونے کا نوٹس بھی واپس لے لیا ہے۔
گزشتہ سال 26 اکتوبر کو ڈی جی نیب لاہور شہزاد سلیم کی تعیناتی مبینہ جعلی ڈگری پر ہونے کا انکشاف ہوا تھا جس پر سپریم کورٹ میں نیب میں غیرقانونی بھرتیوں سے متعلق ازخود نوٹس کی سماعت ہوئی تھی۔
سماعت میں درخواست گزار نے ڈی جی نیب کی تعیناتی سے متعلق انکشاف کرتے ہوئے مؤقف پیش کیا تھا کہ شہزاد سلیم کی ڈگری کیلبری فونٹ میں لکھی گئی ہے جب کہ کیلبری 2007 میں آیا اور ڈگری 2002 کی ہے۔