وزیر اعظم کشکول لے کر پوری دنیا میں گھوم رہا ہے،سعد رفیق

لاہور: مسلم لیگ (ن) کے رہنما خواجہ سعد رفیق نے کہا ہے کہ پاکستان کا وزیر اعظم کشکول لے کر پوری دنیا میں گھوم رہا ہے، یہ نا اہل حکمران ہے جو اس وقت بھکاری بنا ہوا ہے۔
لاہور میں احتساب عدالت میں پیشی کے موقع پر میڈیا سے بات کرتے ہوئے سعد رفیق نے کہا کہ عمران خان کی حکومت نے پاکستان کو مسائل کی دلدل میں دھکیل دیا ہے، مہنگائی بڑھتی جارہی ہے، عام آدمی کی زندگی عذاب ہے،انشاء اللہ اس سول آمریت کی حکومت سے عوام کی جان جلد چھوٹے گی، پاکستان کا وزیر اعظم کشکول لے کر پوری دنیا میں گھوم رہا ہے، یہ نا اہل حکمران ہے جو اس وقت بھکاری بنا ہوا ہے، جو لوگ عمران خان کو لے کر آئے ہیں وہ آج پچھتارہے ہیں۔
سعد رفیق نے کہا کہ حکومت احتساب کے نام پر انتقام لے رہی ہے، ہم نے پاکستان کی خدمت کی ہے، پہلے بھی خدمت کا صلہ جیلوں اور انتقام کی شکل میں دیا جاتا رہا ہے اور آج بھی دیا جارہا ہے، ہمارے ہاتھ صاف اور ضمیر مطمئن ہیں، ہم سر خرو ہو کر نکلیں گے۔