قبائلی اضلاع میں انتخابات۔آزاد 6، پی ٹی آئی 5 اور جے یو آئی 3 نشستوں پر کامیاب

خیبر پختونخوا میں ضم ہونے والے 7 قبائلی اضلاع کی 16 صوبائی نشستوں پر ہونے والے انتخابات میں آزاد امیدواروں نے 6، تحریک انصاف نے 5 اور جمعیت علمائے اسلام (ف) نے 3 نشستوں پر کامیابی حاصل کرلی۔

گزشتہ روز صوبائی اسمبلی کے 16 حلقوں میں پولنگ کا عمل صبح 8 بجے شروع ہوا جو شام 5 بجے تک بغیر کسی وقفے کے جاری رہا تھا۔

الیکشن کمیشن نے خیبر پختونخوا کی 16 صوبائی نشستوں کے نتائج کا اعلان کردیا،الیکشن کمیشن کے مطابق آزاد امیدواروں نے 6 نشستوں پر کامیابی حاصل کی جب کہ پاکستان تحریک انصاف نے 5 اور جمعیت علمائے اسلام (ف) نے 3 نشستوں پر کامیابی حاصل کی، ایک ایک نشست جماعت اسلامی اور عوامی نیشنل پارٹی کے حصے میں آئی۔

ضلع باجوڑ سے صوبائی اسمبلی کی 3 نشستوں میں سے 2 میں تحریک انصاف کامیاب رہی جب کہ ایک پرجماعت اسلامی نے میدان مار لیا۔

باجوڑ پی کے 100 باجوڑ سے پی ٹی آئی کے انورزیب خان 12 ہزار951 ووٹ لے کر کامیاب قرارپائے ہیں جب کہ جماعت اسلامی کے وحید گل 11 ہزار 755 ووٹ لے کر دوسرے نمبر پر رہے۔

پی کے 101 باجوڑ 2 سے پی ٹی آئی کے اجمل خان 12194 ووٹ لیکر کامیاب قرار پائے جب کہ جماعت اسلامی کے ہارون الرشید 10 ہزار 468 ووٹ لے کر دوسرے نمبر پر رہے۔

حلقہ پی کے 102 کے غیرسرکاری غیر حتمی نتائج کے مطابق جماعت اسلامی کے سراج الدین 19 ہزار 88 ووٹ لے کر کامیاب ہوئے ہیں جب کہ پی ٹی آئی کے حمید الرحمان 13 ہزار 436 ووٹ لےکردوسرے نمبر پر رہے۔

مہمند پی کے 103 پراے این پی کے نثار مہمند 10 ہزار 366ہووٹ لے کر کامیاب قرار پائے جب کہ پی ٹی آئی کے رحیم شاہ نے 9 ہزار 186 ووٹ حاصل کرکے دوسری پوزیشن حاصل کی۔

مہمند سے ہی صوبائی اسمبلی کے حلقہ پی کے 104 پر آزاد امیدوار ملک عباس 11751 ووٹ لے کر کامیاب ہوئے ہیں جب کہ جے یو آئی (ف) کے عارف حقانی 9801 ووٹ لے کر دوسرے اور تحریک انصاف کے سجاد مہمند 7755 ووٹ حاصل کرکے تیسرے نمبر پر رہے۔

ضلع خیبر سے صوبائی اسمبلی کی 3 نشستیں ہیں اور تینوں پر ہی آزاد امیدوار کامیاب قرار پائیے ہیں۔ پی کے 105 خیبر 1 سے آزاد امیدوار شفیق شیر آفریدی نے 18 ہزار 135 ووٹ لے کر میدان مارلیا۔ آزاد امیدوار شیر مت خان 6 ہزار 767 ووٹ حاصل کر کے دوسرے نمبر پر رہے۔

پی کے 106 خیبر 2 سے بھی آزاد امیدوار بلاول آفریدی 12ہزار 814 ووٹ لیکر کامیاب ہوئے۔ آزاد امیدوار خان شید آفریدی 6297 ووٹ لے کر دوسرے نمبر پر رہے۔

پی کے 107 خیبر 3 سے آزاد امیدوار محمد شفیق 9 ہزار 896 ووٹ لے کر کامیاب قرار پائے ہیں، آزاد امیدوار حمید اللہ جان آفریدی 8 ہزار 428 ووٹ لے کر دوسرے نمبر پر رہے۔

پی کے 108 ضلع کرم میں جے یو آئی (ف) کے ٹکٹ پر انتخابی میدان میں اترنے والے محمد ریاض شاہین نے 12 ہزار 240 ووٹ لے کر کامیابی حاصل کی، آزاد امیدوار ملک جمیل خان 11 ہزار 638 ووٹ حاصل کرکے دوسرے نمبر پر رہے۔

پی کے 109 کرم 2 سے پی ٹی آئی کے اقبال میاں نے 36 ہزار 536 ووٹ لے کرمیدان مار لیا، آزاد امیدوار عنایت علی 22 ہزار 975 ووٹ لے کر دوسرے نمبر پر رہے۔

پی کے 110 اورکزئی سے آزاد امیدوار غازی عزن جمال اورکزئی 18 ہزار 448 ووٹ لے کر کامیاب قرار پائے ہیں جب کہ پی ٹی آئی کے شعیب حسن نے 14 ہزار 699 ووٹ لئے۔ عزن جمال سابق وفاقی وزیر جی جی جمال اورکزئی کے فرزند ہیں۔

پی کے 111 شمالی وزیرستان سے پی ٹی آئی کے محمد اقبال خان 10 ہزار 200 ووٹ لے کر کامیاب ہوئے جب کہ جے یو آئی (ف) کے سمیع الدین 9 ہزار 288 ووٹ لے کر دوسرے نمبر پر رہے۔

پی کے 112 شمالی وزیرستان 2 سے آزاد امیدوار میر کلام خان 12 ہزار 57 ووٹ لےکر کامیاب ہوئے، جمعیت علماء اسلام (ف) کے صدیق اللہ 7 ہزار 978 ووٹ لیکر دوسرے نمبر پر رہے۔

پی کے 113 جنوبی وزیرستان1 سےجمیعت علمائے اسلام (ف) کے حافظ عصام الدین 10 ہزار356 ووٹ لیکر کامیاب قرار پائے جبکہ آزاد امیدوار وحید زمان 9 ہزار 679 ووٹ لےکر دوسرے نمبر پر رہے۔

پی کے 114 جنوبی وزیرستان 2  سےتحریک انصاف کےنصیراللہ خان 11 ہزار 114 ووٹ لیکر کامیاب رہے جب کہ آزاد امیدوار محمد عارف 10 ہزار 272 ووٹ لیکر دوسرے نمبر پرآئے۔

سابق 6 فرنٹیئر ریجنز پر مشتمل خیبر پختونخوا اسمبلی کے حلقہ پی کے 115 سے جمعیت علمائے اسلام (ف) کے امیدوار محمد شعیب نے میدان مار لیا ۔

واضح رہے کہ خیبر پختونخوا اسمبلی کی 16عام نشستوں کے علاوہ خواتین اوراقلیتوں کے لیے بھی 5 نشستیں مختص ہیں، جن میں عام نشستوں میں کامیابی تناسب کے اعتبارسے دی جائیں گی۔