وزیر اعظم نے بے نامی جائیدادوں کے خلاف کریک ڈاؤن کی ہدایت کر دی

وزیراعظم عمران خان نے ملک بھر میں بے نامی جائیدادوں کے خلاف کریک ڈاؤن کی ہدایت کردی۔

وزیراعظم ہاؤس کی جانب سے جاری اعلامیے کے مطابق وزیرِاعظم کے حکم پر ملک بھر کے تمام ڈپٹی کمشنرز اور ڈویلپمنٹ اتھارٹیز کے سربراہوں کو بے نامی جائیدادوں کی نشاندہی کرنے کی ذمے داری سونپ دی گئی ہے۔

وزیرِ اعظم آفس کی جانب سے تمام صوبائی چیف سیکریٹریز کو جاری مراسلے میں کہا گیا ہے کہ تمام افسران 30 ستمبر تک اپنی رپورٹ چیئرمین فیڈرل بورڈ آف ریونیو (ایف بی آر) کو بھجوانے کے پابند ہیں اور وزیرِ اعظم آفس کو بھی اس رپورٹ کی نقل بھیجی جائے گی۔

رپورٹ میں نشاندہی نہ کی جانے والی بے نامی جائیداد کا بعد میں پتہ چلنے پر متعلقہ ڈپٹی کمشنر اور ڈویلپمنٹ اتھارٹی کے سربراہ کو ذمہ دار ٹھہرایا جائے گا اور متعلقہ افسر کے خلاف بے نامی قانون کے تحت کارروائی عمل میں لائی جائے گی۔

وزیراعظم آفس کے مطابق بے نامی جائیدادوں کے حوالے سے 20 اگست 2019 کو ہونے والے اہم اجلاس میں وزیرِاعظم نے اس بات پر زور دیا کہ بے نامی جائیدادوں کی نشاندہی کیلیے فوری اقدامات کی ضرورت ہے اوراس ضمن میں صوبائی حکومتیں متحرک کردار ادا کریں۔

یاد رہے کہ گزشتہ دنوں حکومت کی جانب سے اثاثے ظاہرکرنے کی اسکیم متعارف کرائی گئی تھی جس کی ڈیڈ لائن ختم ہوتے ہی ملک بھر میں بے نامی جائیدادوں کے خلاف کریک ڈاؤن شروع کیا گیا تھا۔