بیمار قیدی کا کیس چھٹی والے دن بھی سنا جائے گا

اسلام آباد ہائی کورٹ کے چیف جسٹس اطہرمن اللہ نے حکم دیا ہے اڈیالہ جیل کے بیمار قیدی خادم حسین کیلیے کل یعنی عدالتی چھٹی والے دن بھی متعلقین پیش ہوں۔

وزارت صحت اور وزارت انسانی حقوق کی جانب سے نمائندہ پیش نہ ہونے پرعدالت نے اظہار برہمی کرتے ہوئے بذریعہ نوٹس آئندہ سماعت پرطلب کرلیا۔

چیف جسٹس اطہر من اللہ نے کہا کہ میں خود اڈیالہ کا مہمان بنا تھا اس لیے وہاں کے حالات کا علم ہے، جیل حکام کواپنے اختیارات کا علم ہی نہیں، قیدی صرف جیل کی ہی نہیں ریاست کی بھی ذمے داری ہوتی ہے۔

دوران سماعت پنجاب کے ضلع راولپنڈی کی مرکزی جیل اڈیالہ میں گنجائش سے زیادہ قیدی رکھنے کا بھی انکشاف ہوا ہے۔ اڈیالہ جیل کے سپرنٹنڈنٹ نے انکشاف کیا کہ 1500 قیدیوں کی جگہ4800 قیدی رکھے جا رہے ہیں۔

سابق وزیراعظم نوازشریف کی درخوست منظور ہونے کے بعد چیف جسٹس اطہرمن اللہ نے ریمارکس دیے کہ عدالت عام قیدی کی بیماری کا کیس بھی نواز شریف کی طرح سنے گی۔

انہوں نے کہا تھا کہ جب کسی قیدی کی جان کو خطرہ لاحق ہوگا تو عدالت کیس کی سماعت کے لیے بیٹھے گی اور چیف جسٹس 24گھنٹوں میں اس کے قابل سماعت ہونے کا فیصلہ کریں گے۔

ان کا کہنا تھا کہ یہ صرف نواز شریف کیس کے لیے نہیں بلکہ ہر اس قیدی کے لیے ہے جو سزایافتہ ہے، ہم صرف اشرفیہ کے مسائل پر بات کرتے ہیں،عدالت نے عام قیدیوں کے مسائل پر بات کرنا اپنی ذمے داری سمجھا اور اتفاق ہے کہ ایسا ایک ہائی پروفائل کیس میں ہوا۔