جماعت اسلامی کی ریلی پرکریکر سے حملہ۔10افراد زخمی

کراچی کے علاقے گلشن اقبال میں جماعت اسلامی کی کشمیریوں سے اظہار یکجہتی ریلی کے قریب  کریکردھماکے سے 10 افراد زخمی ہو گئے۔

میڈیا رپورٹس کے مطابق ریلی جیسے ہی بیت المکرم مسجد کے قریب پہنچی تو زور دار دھماکا ہو گیا جس کے نتیجے میں 5 افراد زخمی ہو گئے،جماعت اسلامی کے کارکنوں نے زخمیوں کو فوری طورپر گاڑیوں میں ڈال کرقریبی اسپتال منتقل کردیا۔

دھماکے کی اطلاع ملتے ہی رینجرزاور پولیس کی بھاری نفری جائے وقوع پر پہنچ گئی،علاقے کو گھرے میں لے لیا اورریلی کو آگے بڑھنے سے روک دیا گیا۔

پولیس کے مطابق نامعلوم افراد نے کریکر پھینکا  اورفرار ہو گئے،دھماکا ہوتے ہی دھواں پھیل گیا،بم ڈسپوزل اسکواڈ کو بھی طلب کر لیا گیا۔

پولیس حکام کا کہنا ہے کہ جماعت اسلامی کی ریلی گلشن اقبال کے علاقے سے گزر رہی تھی کہ اچانک بیت المکرم مسجد کے سامنے موٹر سائیکل سوار نامعلوم افراد نے کریکر بم پھینکا اورفرارہوگئے،دھماکا ہوتے ہی دھواں پھیل گیا،بم ڈسپوزل اسکواڈ کو بھی طلب کرلیا گیا۔

جماعت اسلامی کے ترجمان کے مطابق بیت المکرم مسجد کے یو ٹرن پر دستی بم پھینکا گیا جس کے نتیجے میں 10 سے زائد افراد زخمی ہوئے۔

جماعت اسلامی کراچی کے امیر حافظ نعیم الحق کا کہنا ہے کہ ریلی پرحملہ حکومت کی ناکامی ہے،را کے ایجنٹوں نے بزدلانہ کارروائی کی ۔