لاہور میں مکان کی چھت گرنے سے 6 افراد جاں بحق

لاہورکے علاقے ٹیکسالی مارکیٹ میں مکان کی چھت گرنے کے نتیجے میں 6 افراد جاں بحق اور4 زخمی ہوگئے۔

نجی ٹی وی کے مطابق لاہور کی ٹیکسالی مارکیٹ میں 3 منزلہ مکان کی خستہ دیوارایک منزلہ مکان کی چھت پر آگری جس کے نتیجے میں 6 افراد جاں بحق اور4 زخمی ہوگئے، واقعے کے بعد اہل محلہ اور ریسکیو ٹیموں نے لاشوں اور زخمیوں کو باہر نکال کراسپتال منتقل کیا تاہم گلیاں تنگ ہونے کی وجہ سے امدادی کاموں میں مشکلات کا سامنا کرنا پڑا۔

ریسکیو ذرائع کے مطابق جاں بحق ہونے والوں میں 2 بچوں سمیت، خواتین اور مرد شامل ہیں جن کی شناخت 50 سالہ جاوید، 2 سالہ بابو اشتیاق، 60 سالہ جاوید، 16 سالہ آمنہ،7 سالہ حسن اور56 سالہ ضیغم کے نام سے ہوئی ہے۔ جاں بحق ہونے والے بچوں کے دادا کا کہنا ہے کہ تین منزلہ مکان کے مالک کو کئی مرتبہ کہا خستہ حال دیوار ٹھیک کرائیں مگر کسی نے نہ سنی۔